Charter Document - 03360047
| Charter Number: | 03360047 |
|---|---|
| Cartulary Title: | Worcester 1062-1185 Volume 33 |
| Charter Language: | Latin |
| Charter Origin: | Religious |
| Charter Type(s): | Recommendation |
| Date: | 1146 |
| Date type: | Assigned |
| Resource Link(s): |
|
Charter:
Domino et patri sanctissimo Eugenio Dei gratia summo pontifici Simon Wigorn[ensis] ecclesie minister humilem salutem et debitam obedientiam Vestre sublimitas dignitatis et vere clementia religionis que summo posita candelabro velut lucerna fulgens domum Dei scilicet sanctam illustrat ecclesiam nostre parvitati dominum et patrem fiduciam adhibet alloquendi Scimus pater reverende presentisque pagine litteris attestamur personam pro qua scribimus vestre sanctitati fore commendabilem Serlonis videlicet abbatis Cir cuius vite integritatem nullus adhuc palam invido lingue iaculo aggressus est vulnerare Debemus igitur pro eo et cum eo excellentie vestre benignitati supplicare vosque piam aurem iustis petitionibus clementer inclinare ut locum tante religionis auctoritate vobis divinitus donata communiatis cum temporalibus scilicet subsidiis usibus canonicorum Deo servientium assignatis et nominatim cum ecclesia de Meleburne de qua spoliati violentam patiuntur iniuriam Unde ex precepto Willelmi Cantuar archiepiscopi et apostolice sedis tunc legati et petitione et assensu Henrici regis cum ceteris appenditiis et omnibus possessionibus ad ecclesiam de Cir pertinentibus abbati prefato cum eum in sede sua statuimus canonicam fecimus investituram Valeat sanctitas vestra pater venerande