Charter Document - 03360003

Reverentissimo ac beatissimo vite sanctitate et summe sedis dignitate prelato Anselmo archiepiscopo Wulstanus servorum Dei minimus Wigornensis ecclesie episcopus merito indignus orationum obsequia fideliaque ex caritate servitia Novit prudentia vestra cotidianos labores et oppressiones sancte ecclesie malignis eam opprimentibus et ipsis quos oportuerat eam tueri auctoribus existentibus Ad hos repellendos et contra tales sanctam ecclesiam defendere sanctitas vestra locata est in summa arce Ne igitur dubitet non eam secularis potentie timor humiliet non favor inclinet sed fortiter incipiat incepta cum Dei adiutorio perficiat insurgentibus obsistat opprimentes reprimat sanctamque matrem nostram contra tales defendat De iis autem unde nobis dignitas vestra scribere et nostre parvitatis est dignata consilium querere quantum recordari possumus dicere non omittimus Hanc denique unde consuluit causam ventilari nunquam audivimus quia nullus aliquando extitit qui hanc Cantuariensi archiepiscopo potestatem adimere vellet et ne dedicationem propriarum duntaxat ecclesiarum publice faceret defenderet Extant quippe et in nostra diocesi altaria et quedam etiam ecclesia in his scilicet villis quas Stigandus vestre excellentie predecessor haud tamen iure ecclesiastice hereditatis sed ex dono possederat secularis potestatis ab ipso dedicata nostris et antecessoris nostri temporibus nobis inconsultis nec antea nec postea quicquam inde calumniantibus utpote hanc specialem potestatem eiusdem metropolitani episcopi esse scientibus Iudicium tamen hinc agitatum aut hoc ex iure sibi iudicatum aliquando minime audivimus sed quod in nostra diocesi eum libere fecisse agnovimus in aliorum etiam facere posse credimus Ecce quantum inde reminisci aut scire potuimus prudentie vestre intimavimus iam quid faciendum sit ipsa consideret Valeat paternitas vestra et pro nobis oret