Charter Document - 03359018
Charter Number: | 03359018 |
---|---|
Cartulary Title: | Norwich 1244-1266 Volume 32 |
Charter Language: | Latin |
Charter Origin: | Religious |
Charter Type(s): | Urging |
Date: | 1243 |
Date type: | Internal, Calendar, Episcopal |
Resource Link(s): |
|
Charter:
Willelmus Dei gratia episcopus Norwicensis dilectis in Cristo filiis abbatibus prioribus archidiaconis officialibus decanis personis vicariis capellanis et ceteris tam clericis quam laycis per Norwicensem dioecesim constitutis salutem gratiam et benedictionem Universi vestram rogandam duximus ac attentius in Domino exhortandam quatinus cum nuntii nobilis ecclesie sancti Pauli Lond ad vos venerint ad ipsius fabricam que sine largitione fidelium vix aut numquam poterit consummari vestras elemosinas petituri eos ob reverentiam beati apostoli Pauli benigne recipientes ad prefatam fabricam pia caritatis subsidia de bonis a Deo vobis collatis per eosdem taliter transmittere studeatis ut per eadem ac alia bona opera ipsius apostoli intervenientibus meritis eternam remunerationem recipere valeatis Vos autem capellani hoc eorundem negotium vestris parochianis per tres dies dominicos aut sollempnes taliter exponere satagatis ut vestram diligentiam in hac parte debeamus merito commendare Et quicquid collectum fuerit sine aliqua diminutione latori presentium fideliter tradi permittatis Nos autem de Dei misericordia gloriose virginis genetricis eius ipsiusque beati apostoli et omnium sanctorum meritis confisi omnibus dicti loci benefactoribus nostre dioecesis et aliis quorum dioecesani id ratum habuerint vere contritis et confessis viginti dies de iniuncta sibi penitentia misericorditer relaxamus concedentes hanc nostram gratiam in nostra dioecesi inperpetuum duraturam Dat London vi idus Iunii pontificatus nostri anno quinto