Charter Document - 03351119

Innocentius episcopus servus servorum Dei venerabilibus fratribus Wintoniensi et Norwicensi episcopis salutem et apostolicam benedictionem Olim sicut bene meminimus vobis et venerabilibus fratribus nostris Lincolniensi Wigornensi Londoniensi et Coventrensi episcopis scripsimus sub hac forma cum nuper priusquam a presentia nostra in Angliam rediretis una vobiscum duxerimus ordinandum ut sex milium marcarum subsidium quod ab ecclesiis Anglicanis pro apostolica sede fuerat postulatum inter episcopatus Anglie dividere curaretis pro vestre arbitrio voluntatis fraternitati vestre per apostolica scripta quatinus quicquid inde feceritis vel iam forte fecistis nobis per literas vestras latori presentium assignandas exprimendo tempus solutionis et locum studeatis quam citius intimare Quod si non omnes hic exequendis poteritis interesse saltem tres vel duo vestrum ea nichilominus exequantur Quia hic nichil est postmodum nostris auribus intimatum fraternitatem vestram de qua fiduciam gerimus specialem monemus attente ac per apostolica vobis scripta firmiter precipiendo mandamus quatinus episcopos memoratos qui presentes fuerint in partibus Anglicanis receptis istis literis admonentes et eisdem auctoritate nostra mandantes ut vicesimo die post susceptionem presentium in certo loco quem vos duxeritis eligendum vobiscum pro divisione conveniant prelibata cum illis episcopis quod eodem die ibidem contigerit convenire distributionem huiusmodi priusquam ab illo loco recesseritis facere procuretis Si vero ipsis aut nullo convenientibus eorum non fuerit super negotio prenominato processum ex tunc infra unius mensis spatium prescriptam subsidii quantitatem faciatis vobis vel nuntiis vestris ad opus apostolice sedis in loco quem elegeritis assignari iuxta ordinationem per dilectum filium nostrum magistrum Martinum camere nostre clericum auctoritate nostra in illis partibus quondam factam quam ad presens sub bulla nostra vobis duximus destinandam contradictores per censuram ecclesiasticam appellatione postposita compescendo indulgentia quacumque vel privilegio quolibet aut constitutione de duabus diebus in generali concilio edita non obstante quicquid hactenus factum est vel fuerit in hac parte nobis absque more dispendio per dilectum filium Linasium scriptorem nostrum latorem presentium rescripturi proviso quod super premissis illam sollicitudinem habeatis quod non possitis exinde de negligentia reprehendi sed potius de diligentia commendari Quod si non ambo his exequendis poteritis interesse alter vestrum ea nichilominus exequatur Huius igitur auctoritate mandati vestram in Domino monemus et exhortamur fraternitatem vobis in virtute obedientie qua sedi apostolice tenemini firmiter iniungentes quatinus de portione prefati domini pape subsidii vobis assignata nuntiis nostris literas nostras patentes super solutione eiusdem deferentibus apud Novum Templum Londoniarum a die Pasche in tres septimanas satisfaciatis talem in facto presenti adhibentes diligentiam ut devotionem vestram summo pontifici merito debeamus commendare