Charter Document - 03350191
| Charter Number: | 03350191 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1265 |
| Date type: | Internal, A.D., Calendar, Episcopal |
| Resource Link(s): |
|
Charter:
Universis sancte matris ecclesie filiis presens scriptum inspecturis vel audituris Symon miseratione divina episcopus Norwicensis salutem in Domino sempiternam Ad universorum notitiam volumus pervenire nos divine religionis intuitu dilectis in Cristo filiis priori et monachis de Rumburg ut eorum caritatis opera ampliore gaudeant fulcimento ecclesiam sancti Michaelis de Suthelmham in qua ius optinent patronatus de qua dimidiam marcam annuam capiunt et per multa tempora ceperunt nomine pensionis Conano eiusdem rectore cedente vel decedente in proprios usus concessisse perpetuis temporibus possidendam ita quod eidem ecclesie secundum suas facultates per proprios capellanos ydoneos competenter et honeste faciant deservire Concessimus insuper eisdem priori et monachis quod decedente vel cedente predicto rectore possessionem prefate ecclesie vacue valeant ingredi et in huiusmodi usus retinere huius nostre concessionis auctoritate salva nobis et successoribus nostris et ecclesie nostre Norwicensi in omnibus iure et dignitate In cuius rei testimonium presenti scripto sigillum nostrum fecimus apponi Dat apud Suthelmham pridie kalendas Iulii anno gratie MCCLX quinto et pontificatus nostri anno octavo