Charter Document - 03350146
| Charter Number: | 03350146 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1264 |
| Date type: | Internal, A.D., Calendar, Episcopal |
| Resource Link(s): |
|
Charter:
Omnibus Cristi fidelibus presentes litteras inspecturis vel audituris Symon divina miseratione episcopus Norwycensis salutem in Domino sempiternam Noveritis nos divine religionis intuitu dilectis in Cristo filiis priori et conventui de Eya ecclesiam de Iakeleye in qua ius optinent patronatus salva vicario qui pro tempore fuerit in eadem deservituro vicaria a nobis taxata in proprios usus concessisse perpetuis temporibus possidendam salvis nobis et successoribus nostris et nostre ecclesie Norwycensi in omnibus iure et dignitate Et ut prioris et conventus predictorum separata sit portio et distincta ab ea quam vicarius optinebit eas sic duximus distinguendas ordinantes quod iidem prior et conventus medietatem decimarum garbarum ad dictam ecclesiam de Iakeleye spectantium percipiant nomine personatus aliam vero medietatem cum alteragio mesuagio domibus et libera terra ad eandem ecclesiam pertinentibus habebit vicarius qui omnia onera debita et consueta episcopalia et archidiaconalia sustinebit onera vero extraordinaria dicti prior et conventus et vicarius pro rata suarum portionum inter se partientur Et quotiens dictam vicariam vacare contigerit prefati prior et conventus ydoneam personam nobis et successoribus nostris ad eandem libere presentabunt Quam ordinationem pontificali confirmantes auctoritate presenti scripto sigillum nostrum fecimus apponi Hiis testibus magistris Iohanne archidiacono Suff Adam de Wautun et Iohanne de Wygorn Roberto de Wymecot Iohanne de Norwyco Iohanne Thebaud et aliis Dat nonas Ianuarii anno Domini millesimo ducentesimo sexagesimo tertio pontificatus nostri anno sexto