Charter Document - 03350132
| Charter Number: | 03350132 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1248 |
| Date type: | Internal, A.D., Calendar |
| Resource Link(s): |
|
Charter:
Omnibus Cristi fidelibus hoc scriptum visuris vel audituris Walterus Dei gratia Norwicensis episcopus salutem in Domino sempiternam Noverit universitas vestra nos in ecclesia de Chippenham dilecto nobis in Cristo abbati et conventui de Waleden per episcopum appropriata invenisse vicariam non per episcopum set per officialem Norwic fuisse taxatam Nos igitur attendentes ad episcopum solum taxationes vicariarum et portionum in ecclesiis pertinere cuius est sectiones et uniones facere in eisdem dictam vicariam de novo pontificali duximus auctoritate taxandam ita videlicet quod vicarius in eadem instituendus habebit totum alteragium cum omnibus ad illud pertinentibus et omnes minutas decimas et decimas de terra hospitalis et monialium de Chikessand et omnes decimas quinque virgatarum terre scilicet de una virgata terre et dimidia de terra Walteri de Chippenham item de tribus virgatis terre Ricardi filii Galfridi et de dimidia virgata terre Roberti filii Ricardi Habebit etiam tertiam partem totius libere terre ad dictam ecclesiam pertinentis Habebit etiam vicarius qui pro tempore fuerit mesuagium quod vicarius nuper defunctus adquisierat de feodo memorati abbatis [et] conventus absque omni servitio imperpetuum et dicti abbas et conventus habebunt mesuagium quod per predictum officialem prelibate vicarie antiquitus fuerat assignatum et in recompensationem dicti mesuagii vicarie assignati habebunt memorati abbas et conventus decem et octo denarios annui redditus de Thoma mercatore de Badlingham percipiendos quod vicarius nuper defunctus percipere solebat Item vicarius sustinebit omnia onera episcopalia et archidiaconalia debita et consueta item onus cereorum et lampadarum quod memorati abbas et conventus sustinere in eadem ecclesia consueverunt Et ne hanc nostram taxationem possit inposterum quisquam minuere vel infirmare eam auctoritate pontificali confirmamus In cuius rei testimonium presens scriptum sigillo nostro fecimus muniri Dat apud Hadham quinto nonas Ianuarii anno Domini millesimo CC quadragesimo septimo Volumus etiam quod cum dictam vicariam vacare contigerit predicti abbas et conventus personam ydoneam nobis et successoribus nostris perpetuis presentent temporibus