Charter Document - 03350126

Walterus permissione divina Norwicensis episcopus negotii crucis executor a sede apostolica deputatus discretis viris decano Cristianitatis de Stafford et iuratis de capitulo salutem in Domino Cum nuper convocatis vobis et aliis de decanatu vestro viris fide dignis sacramentum a vobis receperimus quod prout vobis inferius iniungetur iustas estimationes omnium ecclesiasticorum beneficiorum fideliter inquiretis vobis in virtute obedientie qua sedi apostolice tenemini et sub religione sacramenti ac pena periurii iniungimus quatenus tam a vestris conscientiis propriis quam rectoribus vicariis et aliis quibuscumque personis magis videritis expedire plenius inquiratis veritatem que sit iusta estimatio omnium proventuum ecclesiasticorum tam maiorum quam minorum cuiuscumque sint exemptorum vel non exemptorum in decanatu vestro existentium et que estimatio decimarum separatarum videlicet si quas decimas pensiones vel alios proventus percipiant et habeant in parochiis ecclesiarum iure speciali sive aliquis nomine eorum eas teneat Predictas siquidem iustas estimationes in scriptis fideliter sub pena antedicta redigatis et per literam patentem signis vestris signatam nobis habere faciatis ad terminum et locum vobis infra prefigendos Bona autem religiosorum que non pertinent ad ecclesias eis appropriatas nec sunt decime separate per ipsos religiosos taxabuntur si abbatia vel cella seu prioratus ad quos huiusmodi bona pertinent in vestro fuerint decanatu Si vero in vestro decanatu non existant bona ipsorum per vos taxabuntur et eorum taxationem nobis dilucide et aperte in scriptis habere faciatis Damus siquidem vobis omnibus et singulis plenam potestatem compellendi ad iurandum omnes et singulos de decanatu vestro pro veritate vobis in hac parte manifestanda prout melius videritis expedire contradictores et rebelles si quos in officio vestro inveneritis per interdicti aut excommunicationis sententias nostra freti auctoritate compescendo Consulimus insuper ad vestram salutem et communem liberationem quod in taxationibus faciendis sic diligentes [et] veraces sollicitudine et facto vos habeatis non obstantibus aliquibus taxationibus prehabitis ne ex post facto alii facta vestra et dicta scrutantes vos inveniant a via veritatis manifeste declinasse et in sententiam excommunicationis incidisse que per sedem apostolicam in omnes illos qui scienter in dicta decima subtrahenda vel non solvenda fraudem commiserint promulgari demandatur Volumus etiam si iustum vobis visum fueri quod unusquisque cuius ecclesia tenetur ad firmam iuxta quantitatem firme quam recepit respondeat de decima dum sua voluntate et communi pactione ipsa firma durabit Hoc siquidem officium vobis in remissione peccatorum iniungimus concedentes vobis auctoritate sedis apostolice ut relaxationis indulte omnibus terre sancte subvenientibus participes efficiamini in Domino Predictas autem estimationes in scriptis fideliter redactas nobis vel certo nuntio nostro sigillis vestris signatas tali die apud Lichefeld habere faciatis