Charter Document - 03350112

Omnibus Cristi fidelibus presentes literas visuris vel audituris Walterus Dei gratia Norwicensis episcopus salutem in Domino sempiternam Noveritis nos voluntate et assensu prioris et conventus de Brisete dilecto filio Almarico Peche et uxori sue filie et heredi quondam Radulfi Brien et eorum heredibus cantariam in capella infra septa curie eorum de Brisete constructa concessisse sub hac forma videlicet quod capellanus in eadem ministraturus in primo suo adventu presente priore vel suo procuratore iurabit inspectis sacrosanctis ewangeliis quod omnes oblationes et obventiones undecumque eidem capelle obvenientes matrici ecclesie eadem die qua percipiuntur vel proxime sequenti integre et absque diminutione restituet et quod nullum parochianum matricis ecclesie ad confessionem vel aliquod alium ecclesiasticum sacramentum admittet nisi periculum mortis immineret Erit siquidem prefata capella matrici ecclesie subiecta et in signum subiectionis prefatus Almaricus uxor eius et eorum heredes una cum eorum familia ad matricem ecclesiam diebus infrascriptis scilicet die Natalis Domini die Pasche die Pentecostes die Assumptionis gloriose virginis et die sancti Leonardi cum debitis et consuetis oblationibus ad magnam missam si ibidem fuerint prefatam ecclesiam veneraturi [sunt] Nos autem omnes illos qui aliquid in huiusmodi nostre concessionis preiudicium sive fraudem machinaverint sive fieri procuraverint sententia excommunicationis innodamus In cuius rei testimonium huic scripto sigillum nostrum apponi fecimus Dat apud Hoxum xii kalendas Augusti pontificatus nostri anno sexto