Charter Document - 03350107

Ave Maria gratia plena Dominus tecum In nomine sancte et individue Trinitatis patris et filii et spiritus sancti Amen Nos Walterus Dei miseratione episcopus Norwicensis tenore cuiuslibet verbosi commentarii et etiam prefationis omisso votum et propositum que diu in mente gessimus ac desiderium quod omnem affectum cordis nostri exstirpat et excedit presentibus duximus exprimendum ordinantes diffinentes et etiam statuentes ut ea que in presenti continentur scriptura perpetuis temporibus irrefragabiliter observentur In primis fundavimus hospitale quod dicitur beati Egidii in civitate Norwicensi in honore sancte et individue Trinitatis gloriose virginis Marie beate Anne matris eiusdem virginis gloriose beati Egidii et omnium sanctorum in fundo nostro et terra nostra que est de feodo nostre ecclesie Norwicensis a libere tenentibus ea nostra industria perquisitis Huius hospitalis capud unum extendit se ad vicum qui est ex opposito ecclesie sancte Elene sub muro curie prioris et conventus Norwicensium in latitudine autem extendit se versus aquilonem usque ad magnam ripam fluentem iuxta civitatem predictam in longitudine vero extendit se versus pontem qui dicitur episcopi usque ad fossatum id est inter feodum nostrum et feodum nobilis matrone domine Ysabelle de Cressy Volumus insuper et etiam ordinamus quod in hoc hospitali perpetuis temporibus sit magister qui curam hospitalis eiusdem gerat solicite tam in temporalibus quam in spiritualibus sicut inferius exprimemus et hoc ei in remissione iniungimus peccatorum Quatuor etiam fratres laici perpetuo sint ibidem negotia ipsius hospitalis secundum dispositionem magistri tam in ipso hospitali quam extra diligenter et fideliter vacaturi Tres quoque vel quatuor ibidem erunt sorores bone vite et conversationis honeste per annos plurimos approbate quinquaginta videlicet annos vel parum minus habentes qui omnium infirmorum et aliorum languidorum ibi iacentium solicite curam gerant lintheamina et alia vestimenta lectorum quotiens opus fuerit mutabunt et eis humiliter in necessariis pro viribus ministrabunt et ne plures sint ibi mulieres firmiter inhibemus set omnia fiant per masculos tam in bracino quam in aliis officinis Habebit etiam secum quatuor presbiteros bone fame et conversationis honeste et in officio divino competenter instructos item duos clericos diaconum videlicet et subdiaconum qui divino cultui et obsequio principaliter intendentes preter ea que dominus noster Ihesus Cristus singulis inspiraverit hanc formam specialiter observabunt omnes in aurora diei pulsata videlicet maiori campana consurgent et dormitorium simul exibunt et ecclesiam simul intrabunt induti superpelliciis et cappis clausis nigris scilicet et rotundis et matutinas ac horas alias cum cantu debito et tractu moderato psallent et statim missam de die solempniter celebrabunt ibique fratres et sorores intersint et divina audiant reverenter nec priusquam omnia ista completa fuerint quisquam eorum ecclesiam exire aut per domos aut per curiam discurrere seu vagari presumat solo magistro excepto qui ex causa necessaria exire poterit et aliis pro utilitate domus exeundi licentiam impertiri In hiis siquidem ecclesie officiis divinis consuetudinem ecclesie Sar volumus observari Tres quoque missas in hospitali singulis diebus volumus et statuimus celebrari unam de die aliam de beata et gloriosa virgine Maria et tertiam pro defunctis ita tamen quod una die cuiuslibet septimane fiat plenum servitium de beato Egidio nisi hoc propter quadragesimalis temporis aut aliorum festorum solempnium contingat forsitan impediri Post peracta vero divinorum officia presbiteri ipsi et clerici non per civitatem vel placeas vagabundi discurrant sed in lectionibus orationibus visitationibus infirmorum et aliis operibus caritatis diem expendant nisi de precepto et licentia magistri ipsos ad alia negotia utilia et honesta se transferre contingat idem in fratribus et sororibus volumus observari Et in huiusmodi licentiis dandis sicut in correctionibus et aliis factis sit magister providus et discretus In hoc vero hospitali erunt triginta lecti vel plures secundum facultates ipsius cum culcitris lintheamentibus et etiam coopertoriis ad opus pauperum infirmorum ita quod cum aliquis pauper infirmitate laborans illuc accesserit recipietur benigne et donec sanitati restitutus fuerit iuxta qualitatem sue infirmitatis congrue procurabitur et honeste Cum vero sanus factus fuerit omnibus que secum portavit sibi fideliter restitutis libere cum eisdem recedat Porro in ipso hospitali omnes pauperes presbiteri diocesis Norwicensis qui senio sunt confracti vel continuo morbo detenti ita quod divina celebrare non possunt si alias non habeant unde valeant sustentari recipientur ibidem quoad vixerint moraturi et sustentabuntur congrue de bonis hospitalis iuxta facultates eiusdem Sane septem pauperes scolares in gramatica docibiles de scolis Norwic in fide ipsius magistri per fidele consilium magistri scolarum fideliter eligendi habebunt singulis diebus anni dum scole durant unum pastum in hospitali predicto et cum isti fuerint in gramatica edocti competenter loco ipsorum assumantur septem alii successive eligendi secundum formam superius recitatam et hoc volumus perpetuis temporibus observari Ad hec reficientur in hoc hospitali singulis diebus anni in ipsa videlicet domo hospitalis tresdecim pauperes qui sedebunt in hyeme iuxta ignem ante caminium in estate similiter ibidem et habebunt bonum panem et potum ac unum ferculum carnis vel piscis quandocumque autem casie et ovorum Hoc quidem hospitale erit archa Domini de qua pauperes transeuntes singulis diebus iuxta facultates ipsius elemosinas recipient et grata subsidia caritatis A die vero Annuntiationis beate Marie usque ad Assumptionem eiusdem virginis gloriose qualibet die sabbati certa hora diei pulsata vero prius maiori campana singulis pauperibus tunc presentibus distributio fiat panis cuius panis quantitas recipientis famem repellere valeat illa vice Et quia hoc hospitale erit propria domus Dei et episcoporum Norwicensium volumus et etiam ut quotienscumque episcopus Norwicensis transitum faciens per ipsum hospitale ipsum intraverit et infirmis ac languidis in ipso hospitali iacentibus benedictionem dederit tresdecim pauperes pro ipsius et omnium vivorum ac etiam defunctorum salute eodem die pascantur ibidem et in crastino celebretur missa de sancto spiritu pro eodem et omnibus defunctis Magister quoque presbiteri et fratres communiter in una domo et uno cibo et potu vescantur Post prandium vero omnes simul Deo omnipotenti gratias referentes post versiculam non sumpto potu pulsata maiore campana ingrediuntur ecclesiam hospitalis sancti Egidii predicti dicentes psalmum Miserere mei Deus Quibus ex more peractis poterit magister assumptis secum quos voluerit ad hospites non potationis set recreationis et honestatis causa redire Absente vero magistro presbiter senior suppleat vices eius In ieiuniis siquidem refectionibus et cibariis magister presbiteri fratres et sorores modum illorum qui tenent regulam beati Augustini tenebunt et etiam servabunt eorum tamen habitum non portabunt Magister vero et presbiteri panno honesto et non vetito sive indecenti pro sua voluntate utentur proviso quod in ecclesia habeant superpelicia et nigras cappas rotundas sicut superius est expressum Fratres vero albis tunicis et grisis scapularibus vestientur sorores vero albis tunicis et grisis mantellis erunt indute nigrasque velas portabunt Porro magister et presbiteri sub uno tecto dormiant et quiescant fratres vero similiter per se in uno domo iacebunt sorores vero per se in una domo simul commedant et iacebunt nec aliquis ingredi domum audeat earundemnisi ex causa necessaria petita et optenta prius licentia a magistro Dicto vero completorio omnes ad dormitorium simul accedant nisi magistrum vel alium de suo speciali mandato vel licentia propter hospites vel propter aliam honestam causam seu necessariam opporteat remanere Magister siquidem hospitalis predicti presbiteri fratres et sorores in civitate Norwici extra domum suam nisi in domibus religiosis non commedant neque bibunt et ut sint negotiatores vel dent operam turpo lucri firmiter inhibemus Magister libere fratres et sorores recipiet et admittet nec eos episcopo presentare debebit omnesque in dicto hospitali commorantes presbiteri videlicet fratres sorores clerici et ministri discretioni ipsius magistri et cohercioni canonice subiacebunt Fratres autem et sorores continentiam vovebunt Proprium non habebunt sed per manum et discretionem magistri de domo necessaria recipient universa Promittent quoque sicut et presbiteri magistro obedientiam et servabunt Volumus etiam quod magister qualibet die dominica et alias quotiens fuerit opportunum capitulum teneat et singulorum excessus et delicta corrigat et emendet ac delinquentes iuxta delicti qualitatem puniet et castiget Magister siquidem hospitalis ipsius neminem secum habeat equitantem nisi fuerit unus de presbiteris fratribus seu clericis hospitalis eiusdem ita quod trium evectionum numerum nunquam excedat Nolumus etiam quod in dicto hospitali scutiferi vel pueri sint lacivi Ceterum nolumus quod aliqua mulier recipiatur ad perendinandum vel morandum in hospitali predicto et quotiens contra statutum factum fuerit volumus et etiam ordinamus quod capella ipsius hospitalis dum mulier ibi steterit ipso facto a divinis officiis sit suspensa una tamen missa propter infirmos ad altare deprope submissa voce tantummodo celebretur Magister etiam hospitalis unum beneficium ecclesiasticum etiam curam habens animarum annexam ac alias possessiones que antequam magister ibidem factus fuerit canonice extitit assecutus magistratum illo habere poterit et tenere Omnia tamen que adquisierit postquam magister effectus fuerit erunt hospitalis eiusdem et omnia in ipsius hospitalis dominio conservabuntur ac penes ipsum hospitalem perpetuis temporibus remanebunt et hoc se facturum et efficaciter curaturum corporali prestito sacramento in sua confirmatione promittet Commune siquidem sigillum domus sub duabus clavibus erit magistri videlicet et fratris senioris eiusdem nec aliquid nisi in capitulo et in presentia fratrum tunc domi existentium sigillabitur de eadem Decedente vero vel recedente dilecto in Cristo Hamone de Calthorp nunc magistro hospitalis eiusdem circa electionem hanc formam volumus perpetuis temporibus observari Defuncto magistro et eius corpore tradito sepulture vel etiam alias eo cedente vacatio hospitalis per duos fratres nuntiabitur priori Norwicensi et ipse archidiaconos Norwic et Norff huius nostre ordinationis auctoritate protinus evocabit ut certo die infra tres septimanas numerandas a morte magistri vel cessionis ipsius apud Norwicum in ipso hospitali conveniant de futuri magistri creatione unanimiter tractaturi et hii tres facta prius inquisitione diligenti per fratres eiusdem hospitalis iuratos super ydoneitate presbiterorum in eodem hospitali commorantium de ipsis presbiteris aut etiam aliis forensibus prout eis secundum Deum et suas conscientias visum fuerit expedire ad regimen dicti hospitalis personam congruam et honestam eligent et assument quam episcopo Norwicensi infra octo dierum spatium post electionem celebratam per suas literas patentes presentabunt et si episcopus Norwicensis tunc fuerit extra regnum persona electa presentabitur officiali Norwicensi qui ipsam sicut episcopus sine obstaculo cuiuslibet contradictionis admittet Si autem dicti archidiaconi ad diem assignatum non convenerint ipsos per duos dies proximo sequentes volumus expectari et si non venerint taliter expectati dictus prior associatis sibi officiali consistorii Norwici et decano Norwic procedet in dicto negotio illa vice sicut procedere deberet cum archidiaconis antedictis et eandem formam volumus observari si dictos archidiaconatus tunc vacare contingat Si autem unus archidiaconatuum vacans fuerit vel unum archidiaconum tamen abesse contigerit tunc dictus prior cum archidiacono presente associato sibi dicto officiali consistorii vel decano in negotio procedat secundum formam superius recitatam et eandem formam ab ipsis archidiaconis volumus observari si prior convenire noluerit cum eisdem vel prioratum tunc vacare contingat Volumus eciam quod si vacante prioratu Norwici magistrum hospitalis cedere contingat vel decedere vacatio eiusdem hospitalis dictis archidiaconis protinus nuntietur ut ipsi ad eligendum magistrum in forma prescripta conveniant et accedant Quod si prior et alii superius numerati infra quinque septimanas postquam corpus magistri dicti hospitalis traditum fuerit sepulture vel post cessionem eiusdem in personam certam ut provisimus non consenserint episcopus Norwicensis illa vice de persona ydonea hospitali provideat memorato hoc firmiter observato quod quicumque prefici debeat sit sacerdos et iuret continuam residentiam se facturum ita tamen quod si habeat beneficium ecclesiasticum ad illud quandocumque valeat declinare proviso quod ibidem ultra octo dies vice aliqua non moretur Iurabit insuper dictus magister in creatione sua quod ipsum hospitale et omnia ad ipsum pertinentia bene et fideliter quantum in ipso est custodiet et tractabit quod etiam immobilia eiusdem non alienabit et quod mobilia in usus ipsius domus et pauperum ibi Cristi fideliter secundum nostram ordinationem expendet et expendi efficaciter procurabit Dictum autem hospitalem cum omnibus suis pertinentiis dum vacans fuerit erit sub custodia et cura Norwicensis episcopi sub hac forma quod episcopo in ipsa vacatione nichil omnino de bonis eiusdem recipiet hospitalis sed statim et absque difficultate aliqua uni de discretioribus prebiteris dicti hospitalis interim custodiam ipsam committet qui omnia ad opus pauperum et infirmorum per sacramentum suum fideliter et absque fraude conservet et magistro qui ibidem creabitur de omnibus interim perceptis et expensis reddat fideliter rationem Hec siquidem statuta nostra et alia quoad correctionem reformationem honestatem et utilitatem dicti hospitalis et ibidem commorantium a nobis in posterum statuenda volumus et precipimus similiter observari Hoc siquidem hospitale sic fundatum cum omnibus suis pertinentiis damus perpetue libertati et omnia que sunt infra septa eiusdem hospitalis eidem hospitali magistro et fratribus ad eorum ac pauperum sustentationem in liberam puram et perpetuam elemosinam concedimus atque damus absque omni servitio secullari exactione sectis curiarum et demanda salvis nobis et successoribus nostris iure patronatus hospitalis eiusdem correctione etiam et reformatione in spiritualibus omnium in dicto hospitali commorantium nobis et successoribus nostris specialiter reservata Et ne hec nostra provisio et ordinatio pro defectu necessariorum futuris temporibus valeat impediri possessiones supradictas et terram de Hethell cum suis pertinentiis prefato hospitali magistro et fratribus ad sustentationem pauperum et infirmorum concedimus et omnia predicta unacum aliis bonis que in presenti possident vel futuris temporibus adipisci poterint carte presentis munimine confirmamus ecclesias insuper de Calthorp de Costesey de Kringelford sancte Marie de Walsham de Hardele et de Senges eis in proprios usus concedimus et etiam confirmamus salvis dilectis in Cristo filiis priori et conventui Norwicensis ecclesie decem marcis de bonis ecclesie de Senges cum vacaverit eisdem in duabus synodis Norwicensibus per manum magistri eiusdem hospitalis annuatim solvendis postquam dicte ecclesie possessionem pacificam fuerit assecutus Concedimus etiam eisdem quod possessionem ecclesiarum sancte Marie de Walsham et de Sengis cum vacaverint licite ingredi valeant et tenere auctoritate huius nostre confirmationis et collationis alterius consensu vel assensu minime requisito Concedimus insuper eis perpetuam et liberam cantariam in capella dicti hospitalis quam consecravimus necnon et aliis suis oratoriis unacum sepultura ad opus omnium ibidem decedentium necnon aliorum omnium ibidem volentium et eligentium sepelliri ecclesiarum parochialium iure salvo Omnibus autem hanc nostram ordinationem observantibus et ad eius conservationem consilio et auxilio laborantibus benedictionem inperpetuum Dei omnipotentis et Domini Ihesu Cristi et singulis annis in festo sancti Egidii quadraginta dies de iniuncta sibi penitentia misericorditer relaxamus Illos autem qui ad huius nostre ordinationis subversionem laborabunt seu aliquid procurabunt quo minus nostra ordinatio futuris temporibus sortiatur effectum vel quicquid contra ipsam maliciose fuerint machinati auctoritate Dei omnipotentis patris et filii et spiritus sancti excommunicationis vinculo innodamus Et ut omnia supradicta in perpetuum firma et stabilia et rata consistant presenti scripto sigillum nostrum unacum sigillo capituli nostri Norwicensis de cuius expresso consensu ac assensu omnia supradicta concedimus ordinamus et confirmamus est appensum Dat in capitulo Norwicensi presentibus dilectis in Cristo filiis Symone priore Norwicensi et suo conventu