Charter Document - 03350106
| Charter Number: | 03350106 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1253 |
| Date type: | Internal, A.D., Calendar |
| Resource Link(s): |
|
Charter:
Omnibus Cristi fidelibus has litteras inspecturis Walterus Dei gratia Norwicensis episcopus salutem in Domino sempiternam Cum ius patronatus ecclesie de Senges ad nos pro una medietate et ad dilectos in Cristo priorem et conventum Norwicensem pro alia medietate pertineret ac iidem prior et conventus totum ius suum nostre ordinationi totaliter et absolute committerent nos tandem taliter duximus ordinandum quod dilecti in Cristo filii magister et fratres hospitalis sancti Egidii Norwic predictam ecclesiam de Senges cum omnibus pertinentiis suis post decessum vel recessum dilecti in Cristo filii magistri Ricardi nunc rectoris eiusdem in proprios usus perpetuis temporibus possidebunt et ipsam eis ad presens quantum in nobis est concedimus et assignamus salva vicaria ibidem per nos taxanda ad quam quotiens ipsam vacare contigerit predicti magister et fratres personam idoneam nobis et successoribus nostris libere presentabunt Magister siquidem et fratres antedicti dilecto in Cristo filio elemosinario Norwicensi singulis annis decem marcas de bonis ecclesie memorate persolvent ad elemosinam singulis diebus Sabbati a festo Assumptionis beate virginis Marie usque ad festum Annunciationis Domini in dimidia marca ad minus perpetuis temporibus augendam Et quoniam predicte decem marce ad elemosinam toto tempore prescripto ut dictum est augmentandam non sufficiunt idcirco quinque marcas annuas dicto elemosinario aliunde concessimus et assignavimus prout in littera nostra super hoc confecta plenius continetur Dicti quoque magister et fratres singulis annis die anniversarii nostri Placebo et Dirige in ecclesia sua sollempniter cantabunt et singuli capellani unam missam pro anima nostra specialiter celebrabunt et centum pauperibus in cibo et potu victui necessaria sufficienter ministrabunt In cuius rei testimonium sigillum nostrum unacum sigillis capituli Norwicensis et magistri hospitalis antedicti presentibus est appensum et facta sunt super hoc tria instrumenta eiusdem tenoris quorum unum residet penes nos aliud penes prefatos priorem et conventum et tertium penes magistrum et fratres supradictos Dat apud Lamburne xiii kalendas Novembris anno Domini MCCL tertio