Charter Document - 03350102

Walterus Dei gratia Norwycensis episcopus dilectis in Cristo filiis universis abbatibus prioribus archidiaconis officialibusdecanis ecclesiarum rectoribus vicariis et omnibus Cristi fidelibus per diocesim Norwycensem constitutis salutem gratiam et benedictionem Ad officium pastorale licet indingni assumptiet loco eminenti inmerito constituti summo et pio desiderio affectamus nunc bene operando nunc malum extirpando dignos Deo fructus ex nostro inpendere officio Sane recolimus dum adhuc in minori essemus officio constituti wlgariter esse dictum et optentum quod quilibet rector sive vicarius nostre dyocesis qui vivus die Pasce expectaret de omnibus fructibus nomine ecclesie sive vicarie sue usque ad synodum sancti Michaelis proximo sequentem percipiendis libere ut vellet suum conderet testamentum Set contra hanc consuetudinem a fundatione ecclesie Norwycensis prout novimus et legittime constat optentam a quibusdam voluntarie extitit introductum et servatum quod fructus et bona ecclesiarium vacantium a die Pasce usque ad synodum Pasce non in usus decedentium et condentium legittime testamenta cederent ut premisimus set voluntati et dispositioni loci diocesani relinquerentur omnino propter quod status decedentium graviter ledebatur et testantium frequenter non processit voluntas Ut igitur status ecclesie singulorum reparetur ac ad libertatem et consuetudinem debitam et consuetam singuli revocentur nos Walterus de Suffeld episcopus Norwycensis in synodo sancti Michaelis Norwic presidentes de consensu capituli nostri diocesana et presentis synodi autoritate omnibus existentibus in synodo sancta consentientibus diffinimus statuimus et precipimus et concedimus ut iuxta antiquam consuetudinem quam renovamus reintegramus approbamus et confirmamus omnes rectores et vicarii viventes die Pasce et ex tunc quandocunque morientes usque ad synodum sancti Michaelis de fructibus et obventionibus beneficiorum suorum libere sua secundum consuetudinem antiquam condant testamenta salvis nobis et successoribus nostris fructibus ecclesiarum vacantium ante diem Pasce et in quibus rector die Pasce non reperitur institutus Et caveat sibi episcopus qui preest et qui pro tempore fuerit ne causa lucri inhonesti absque causa rationabili canonice presentatos usque post diem Pasce voluntarie differat admittere Omnes autem illi qui hanc nostram constitutionem concessionem et libertatem infringere immutare sive perturbare presumpserint excommunicationis sententiam nostram et presentis sancrosancte synodi auctoritate incurrent In cuius rei testimonium presentibus sigillum nostrum et sigillum capituli nostri sunt appensa testibus archidiaconis Norwycensis eccleie abbatibus prioribus decanis rectoribus vicariis et omni clero et populo sinodi Actum die synodi scilicet die lune proximo post festum sancti Michaelis in ecclesia sancte Trinitatis Norwyci anno Domini millesimo CCLV et pontificatus nostre anno xi