Charter Document - 03350097
| Charter Number: | 03350097 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1253 |
| Date type: | Internal, A.D., Calendar |
| Resource Link(s): |
|
Charter:
Omnibus Cristi fidelibus presentes litteras visuris vel audituris Walterus Dei gratia Norwicensis episcopus salutem in Domino sempiternam Licet singulorum religiosorum cura nobis sit commissa dilectorum tamen filiorum prioris et conventus Norwicensium curam tenemur gerere specialem et eos amplioribus prosequi beneficiis quos dilectionis amplectitur prerogativa Hinc est quod dictorum prioris et conventus paci securitati et indempnitati providere cupientes concedimus et presenti carta nostra confirmamus eisdem in proprios usus omnes ecclesias et beneficia a predecessoribus nostris eis collata prout in cartis eorundem continetur exceptis ecclesiis quarum ius patronatus ad nos in presenti spectare dinoscitur et insuper annuum redditum quem percipiunt et percipere consueverunt cum omni integritate et absque diminutione de prioratibus de Lenna de Gernemuta et de Audeby percipiendum perpetuis temporibus per manus priorum ibidem commorantium qui per nos et successores nostros in capitulo Norwicensi priores instituuntur et curam animarum in ipsis ecclesiis gerendam recipiunt salvo residuo omnium proventuum prioribus antedictis ipsarum ecclesiarum de Lenna de Gernemuta et de Audeby ad eorundem priorum et monachorum ibidem commorantium sustentationem et pauperum Ihesu Cristi refectionem Omnes autem easdem ecclesias cum pertinentiis dictis priori et conventui in proprios usus perpetuo concedimus possidendas salvis vicariis more solito conferendis salvis etiam in omnibus iure episcopali et consuetudine In huius rei testimonium huic scripto sigillum nostrum apponi fecimus Dat apud Norwicum quinto kalendas Augusti anno Domini millesimo ducentesimo quinquagesimo tertio