Charter Document - 03350090
| Charter Number: | 03350090 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1246 |
| Date type: | Internal, Calendar, Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Walterus Dei gratia episcopus Norwycensis salutem in Domino Noverit universitas vestra quod cum dilecti in Cristo filii prior et conventus sacrosancte Norwycensis ecclesie nostris temporibus in suis maneriis episcopalis iurisdictionis exemptionem vendicassent quam ut dicebant predecessorum nostrorum habere temporibus consueverant nos in eorundem iniuriam nostram iurisdictionem dilatare nolentes eisdem de gratia concessimus speciali quod ad custodiam spiritualitatis maneriorum aliquem virum idoneum in episcopatu Norwycensi beneficiatum et residentem tamquam decanum nobis possint presentare et nos ab eodem presentato obedientia recepta canonica ipsum ad memoratam custodiam sine omni difficultate admittemus matrimonialium et criminalium causarum cognitionibus in eisdem maneriis nobis specialiter reservatis De eorundem etiam assensu et voluntate visitandi et corrigendi potestatem et exercendi iurisdictionem nostram pleno iure in prefatis maneriis cum nos vel officiales nostri ad eadem personaliter voluerimus declinare nobis et officialibus expresse reservavimus concedentes eisdem quod presentatum ad ipsis in iure quod alii decani in nostro episcopatu optinent plenarie conservabimus Si vero in prefatis maneriis coram nobis vel officialibus nostris incepte cause comode in eisdem nequiverint terminari extra dicta maneria ipsas causas evocandi et litigantibus diem prefigendi nobis et officialibus nostris potestatem pariter reservavimus Volumus etiam quod si dictorum maneriorum homines in aliquibus causis movendis nostrum examen vel officialis nostri duxerint eligendum ut tunc nobis vel eidem officiali easdem causas libere audire liceat dicti decani contradictione non obstante Nolumus siquidem quod per hanc concessionem nostram archidiaconis seu decanis in prefatis maneriis ullum iurisdictionis tribuatur incrementum In huius rei testimonium presenti scripto sigillum nostrum duximus apponendum Data apud Blafeld ii nonas Februarii pontificatus nostri anno primo