Charter Document - 03350078

Omnibus Cristi fidelibus presentes litteras inspecturis Walterus miseratione divina Norwicensis episcopus salutem in Domino sempiternam Cum nobis esset a sede apostolica demandatum quod Henrico Montichello nepoti venerabilis patris Dei gratia Sabinensis episcopi sancte Romane ecclesie cardinalis in beneficio ecclesiastico certe estimationis faceremus auctoritate apostolica provideri nos cupientes mandatum apostolicum quod reverenter recepimus adimplere in portione ecclesie de Walepol nostre diocesis que ad patronatum [W] prioris et capituli de Lewes noscitur pertinere ei volumus secundum formam nobis traditam providere ignari tamen vere estimationis beneficii memorati et quod iidem prior et capitulum alias ad mandatum apostolicum ut dixerunt probare parati erant consimili provisione gravati Nos tandem auditis que memorati prior et capitulum pro se et clericus exadverso super dicta provisione in nostra presentia proponebant cum nobis videntur merito a sapientibus dubitandum utrum provisio in beneficio prefato locum habere deberet partes ad viam concordie inducere nitebamur de quarum consensu taliter duximus ordinandum quod in prefato beneficio hac vice provisio non procedat verum ut eidem clerico qui gratiam prosequitur in aliquo prospiciatur donec ei fuerit provisum iuxta traditam nobis formam quod ipse interim singulis annis a rectore apud Novum Templum London in festo Assumptionis virginis gloriose de bonis dicte ecclesie quicumque eam possideat quindecim marcas argenti in pecunia percipiat numerata Et si forte aliquo termino in solutione cessaverit rector qui pro tempore fuerit centum solidos clerico et nobis decem marcas solvat nomine pene pro quolibet termino non servato potestate nobis reservata ad compellendum partes ad observationem omnium premissorum et pena soluta obligatione nichilominus durature Consenserunt etiam expresse ipsi prior et conventus quod in beneficio ad eorum patronatum spectante in nostra diocesi quam cito facultas se offeret possit dicto clerico libere provideri secundum quod in directo nobis mandato apostolico continetur eorum oppositione cessante nisi prius ei fuerit alibi auctoritate apostolica competenter provisum In cuius rei testimonium et signum consensus expressi prefati prior et conventus et clericus unacum sigillo nostro sigillis suis presentes litteras muniverunt Dat apud Stok monachorum xvii kalendas Decembris anno Domini millesimo CCXL nono