Charter Document - 03350077
| Charter Number: | 03350077 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1246 |
| Date type: | Internal, A.D. |
| Resource Link(s): |
|
Charter:
Universis Cristi fidelibus hoc presens scriptum visuris vel audituris Walterus Dei gratia Norwicensis ecclesie minister humilis salutem eternam in Domino Cum sublimis ordo Cluniacensis olim in disciplina funditus que morum est ordinata correctio in suo proposito sic proficiat quod in observantiis regularibus non deficiat sic odore sue conversationis bone omnes reficiat quod nonnullos sui exemplo ad meliora invitet prout a puplica mundi lingua predicatur unde plenitudinem favoris et gratie erga omnes promerunt equum est inter benefactores suos qui eum possessionibus ditarunt et extulerunt honoribus nos quos a prima persone nostre notitia semper inter viscera caritatis specialiter gesserit sibi non inveniat indevotos Hinc est quod venerande religionis domum Lewensem meritis sue conversationis Deo et hominibus dilectam nobilis Cluniacensis filiam et a matre morum venustate et regulari observantia non degenerem pro favore prosequentes priori ipsius et conventui quorum conversatio sublimis eos omni honore reddit dignos gratiam nostram volentes non deesse ipsis ecclesiam de Thoftes iuxta Fakenham in Norfolk vacantem per mortem Ranulfi Britonis quondam rectoris eiusdem que de eorundem est advocatione in proprios usus concessimus possidendam reservata nobis facultate taxandi vicariam in eadem cum voluerimus Et ut hec nostra concessio perpetuam habeat firmitatem huic scripto sigillum nostrum apponi fecimus Hiis testibus magistro Willelmo de Horham officiali Norwic Iohanne de Holcham et Thoma de Teye capellanis Alexandro rectore ecclesie de Koleby Willelmo de Wytewell Hugone de Corbrigg et Willelmo de Sidsterne clericis Dat apud Lennam idus Decembris anno gratie millesimo ducentesimo quadragesimo sexto