Charter Document - 03350071

Omnibus Cristi fidelibus has litteras visuris vel audituris Walterus miseratione divina Norwicensis episcopus salutem in Domino Cum dilecti filii abbas et conventus sancti Benedicti de Hulmo Egidium de Stalham clericum ad ecclesiam de Potterehecham nobis presentassent et magister Berardus de Nimpha scriptor domini pape Petro Lene clerico nato nobilis viri Bartholomei Alexi civis Romani eandem ecclesiam auctoritate apostolica contulisset ac super hoc inter predictum Petrum ex una parte et dictos abbatem et conventum ac Egidium ex altera questio verteretur tandem partes nostre ordinationi se totaliter subiecerunt prestito sacramento corporali quod nostram ordinationem fideliter observarent Nos igitur nobiscum habita deliberatione taliter duximus ordinandum partium etiam subsecuto consensu quod dictus Egidius habeat et possideat memoratam ecclesiam ad presentationem abbatis et conventus predictorum et predictus Petrus de camera eorundem abbatis et conventus quinque marcas percipiat annuatim donec ei in beneficio ecclesiastico secundum formam obligationis ei facte provisum fuerit per eosdem Et quoniam de iuris equitate ipsius debet esse onus cuius est emolumentum volumus et ordinamus quod predicti abbas et conventus dictas quinque marcas percipiant de bonis ecclesie memorate eis per manus dicti Egidii vel rectoris qui pro tempore fuerit fideliter solvendas ita tamen quod post decessum dicti Petri vel postquam beneficium ecclesiasticum assecutus fuerit ab eisdem non competat eis ius petendi vel exigendi predictam summam pecunie a rectore memorato vel suo successore sed quod ad eorum exonerationem eis concessum est ipsis liberationem consecutis cessare volumus omnino In cuius rei testimonium presenti scripto sigillum nostrum unacum sigillo dicti rectoris est appensum Dat apud Hevingham quarto idus Iulii pontificatus nostri anno nono