Charter Document - 03350040
| Charter Number: | 03350040 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1245 |
| Date type: | Internal, Calendar, Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Walterus Dei gratia Norwicensis episcopus salutem in Domino Noveritis nos de voluntate et consensu dilectorum filiorum prioris et conventus de Panten karissime in Cristo filie domine Agneti le Enveyse quoad vixerit liberam cantuariam in capella in curia sua de Chetestan constructa concessisse sub hac forma videlicet quod capellanus in ea ministraturus in primo suo adventu presente vicario matricis ecclesie vel suo capellano iurabit inspectis sacrosanctis evangeliis quod omnes oblationes et obventiones matrici ecclesie eadem die qua percipiuntur vel proxima sequenti integre et absque diminutione restituet et quod nullum parochianum matricis ecclesie ad confessionem sive aliquod aliud sacramentum ecclesiasticum admittet nisi periculum mortis imineret Erit siquidem prefata capella matrici ecclesie subiecta et in signum subiectionis prefata domina unacum familia sua ad matricem ecclesiam accedet diebus infrascriptis videlicet die natalis Domini et die Pasche Assumptionis beate Marie et festivitatis ecclesie cum debitis et consuetis oblationibus ad magnam missam si ibidem fuerit prefatam ecclesiam veneratura Nos vero omnes illos qui aliquid in huius nostre concessionis preiudicium sive fraudem machinati fuerint sive fieri procuraverint sententia excommunicationis innodavimus Decedente vero dicta domina predicta capella ipso iure sit suspensa sine spe administrandi in ea In cuius rei testimonium presenti scripto sigillum nostrum apponi fecimus Datum apud Panten ii nonas Maii pontificatus nostri anno primo