Charter Document - 03350036
| Charter Number: | 03350036 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1252 |
| Date type: | Internal, A.D., Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Walterus Dei gratia episcopus Norwicensis salutem in Domino sempiternam Noverit universitas vestra quod cum dilectus filius Willelmus de Sydestern aliquando rector ecclesie de Bermere que est de advocatione dilectorum filiorum prioris et conventus de Cokesford post adeptum beneficium in ecclesia de Hindringham ad consilium nostrum dictam ecclesiam in manus nostras resignasset et dicti prior et conventus eandem ecclesiam ea vice ordinationi nostre commisissent nos pensatis ex una parte meritis dictorum prioris et conventus in laudabili observantia regulari et in gratia hospitalitatis copiose pro viribus suis item attendentes ex altera parte quod olim prior et conventus de Cokesford qui tunc fuerunt memoratum Willelmum a scolis in primordio sui profectus in obsequium ecclesie sue vocaverunt in quo fideliter stetit et laudabiliter per septem annos vel fere unde forte iacturam eruditionis et temporis qua nulla maior incurreret item percipientes erga eundem dictorum prioris et conventus voluntatem bonam et gratiosam et ad gratam obsequii ecclesie eorundem inpensi remunerationem paratam attendentes etiam quod modicum beneficium quod habet in dicta ecclesia de Hindringham ad honestam ipsius sustentationem non sufficit et quod tenuis sit et exilis in proventibus supradicta ecclesia quam resignavit de memorata ecclesia post aliquot dies taliter duximus ordinandum videlicet concessimus quod ad hospitalitatem dicte domus de Cokesford augmentandam prefatam ecclesiam de Bermere habeant in usus proprios eiusdem prioris et conventus ita tamen quod idem Willelmus liberam terram eiusdem ecclesie habeat et ipsius ecclesie fructus suo perpetuo percipiat solvendo singulis dictis priori et conventui nomine firme unam marcam argenti in duabus synodis Norwicensibus pro equalibus portionibus licet iidem fructus multo maioris valoris existant et post eius decessum vel recessum omnes fructus ecclesie predictos cum libera terra habeant iidem prior et conventus salva honesta sustentatione vicarii qui in ea pro tempore ministrabit per nos vel successores nostros perpetuo ordinanda et salvis in omnibus episcopalibus consuetudinibus et nostre Norwicensis ecclesie dignitate In cuius rei testimonium huic scripto sigillum nostrum fecimus apponi Data apud Weseham vi idus Decembris anno Domini millesimo CCL secundo et pontificatus nostri anno viii