Charter Document - 03350034
| Charter Number: | 03350034 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1254 |
| Date type: | Internal, A.D., Calendar |
| Resource Link(s): |
|
Charter:
Walterus permissione divina Norwicensis episcopus negotii crucis executor a sede apostolica deputatus dilectis sibi in Cristo decano de Nort Iohanni rectori ecclesie de Certell Roberto vicario de Sipton W rectori ecclesie de Spillesbr et magistro I rectori ecclesie de Cerceden salutem in Domino sempiternam Cum nos convocato capitulo vestro et clero universo coram nobis apud Eynesham sententiam excommunicationis in genere auctoritate apostolica promulgaverimus in omnes illos qui vel in subtrahenda decima proventuum suorum ecclesiasticorum tam maiorum vel minorum vel non solvenda scienter fraudem commiserint vobis mandamus in virtute obedientie sub pena suspensionis iniungentes quatinus hanc sententiam publicantes singulis rectoribus et vicariis sub pena excommunicationis antedicte iniungatis ut iustam suorum proventuum ecclesiasticorum estimationem absque fraude vobis plene exprimant et manifestent iuxta sue conscientie veritatem Vos siquidem sub sacramento nobis prestito tam ab ipsis rectoribus [et] vicariis si presentes fuerint quam ab aliis prout melius videritis expedire plenius inquiratis veritatem videlicet que sit iusta estimatio tam maiorum quam minorum et ipsam iustam estimationem in scriptis fideliter redigentes signatam sigillis vestris in crastino beati Petri ad vincula in ecclesia beati Iacobi Norhampton absque ulteriori dilatione tradatis subpriori custodiendam et nobis vel nuntio nostro litteras nostras differenti fideliter restituendam Transcriptum autem penes vos retineatis et salvo custodiatis Damus autem vobis omnibus et singulis vestrum plenam potestatem compellendi ad iurandum omnes et singulos pro veritate vobis in hac parte manifestanda prout melius videritis expedire Hoc siquidem officium vobis in remissionem peccatorum iniungimus concedentes vobis auctoritate sedis apostolice ut relaxationis indulte subvenientibus in terre sancte subsidium participes efficiamini in Domino Insuper tu fili decane qui de negotio crucis fideliter exequendo una cum supradictis sacramentum prestitisti corporale super legatis in terre sancte subsidium plenius inquiras veritatem et quod inveneris in scriptis redigas et requisitus gerenti vices nostras in hac parte habere facias Hac etiam venientibus predicare crucem et ex parte ecclesie missis iuxta formam mandati nostri obedias et reverenter eisdem assistas ac devote Valete Dat apud Eynesham xv kalendas Augusti anno Domini MCCLIIII