Charter Document - 03350018

Omnibus presentes litteras inspecturis Walterus miseratione divina Norwycensis episcopus salutem in Domino Quoniam humane fragilitatis tam infirma est conditio quod ea que in presenti vita aguntur a memoria cito decidunt et non perraro oblivionis tenebris obumbrantur quedam que per venerabilem fratrem B Dei gratia Cantuariensem electum in ecclesia Cantuariensi fieri vidimus ad perpetuam eius rei memoriam in scriptis duximus annotanda In primis vidimus ipsum ingredi capitulum quo omnes officiales sua deposuerunt officia et qui claves habebant eas eidem reddiderunt et vidimus prefatum dominum electum deferre claves ipsorum usque ad cameram suam et eas tradere cuidam laico servienti suo seculari In creatione prioris sic procedebat in primis omnibus de conventu in capitulo presentibus inhibuit in virtute obedientie et sub pena excommunicationis ne quis eorum quemquam sibi nominaret gratia vel favore nisi quem crederet ydoneum ad regimen prioratus Post hec omnibus exeuntibus capitulum omnes sigillatim requisivit interrogando unumquemque sic quid tibi videtur magis ydoneus ad regimen prioratus et ipsemet electus propria manu in tabulis scribebat dicta singulorum ita quod nullus monachus quid a quo diceretur prescire valeret Verum quidam monachus sedens a remotis scribebat nomina examinatorum et personas nominatas nunc per signa nunc per figuras prout idem electus in animo concipiebat Quid tamen sibi volebant illa signa vel figure nullus sciebat nisi ipse electus solus Post hec omnibus sic examinatis vidimus electum recedere et eadem nocte prefatus electus apud Wengham in camera sua nobis et aliis quos volebat presentibus excluso monacho Cantuariensi dicta sic examinatorum sibi et suo consilio legebat et quem vellet priorem preficere tractabat non multum innitens examinationi sed potius sue proprie conscientie et utilitati domus Et cum iam ordinasset cum suo consilio de Nicholao de Sandwich creando in priorem in crastino reversus est ad capitulum et eum eis nominavit et prefecit priorem et statim surgens et incipiens Miserere mei Deus ingressus ecclesiam ipsum priorem installavit Post hec volens de creatione officialium tractare iussit in camera sua ad se venire priorem et alios monachos pro sua voluntate et ibidem de personis preficiendis tractavit cum eis et postea ingressus est capitulum et quem volebat ad hanc vel illam nominabat obedientiam et officium committebat eidem Quosdam etiam prout volebat ad priora officia restituebat subpriorem scilicet et alios et hac una vice omnes infrascriptos creavit et prefecit priorem suppriorem precentorem celerarium camerarium sacristam penitentiarios extra et intra Hec siquidem acta fuerunt apud Cantuariam die martis proxima ante festum apostolorum Symonis et Iude et duobus diebus sequentibus anno Domini MCCXLIIII In huius rei testimonium nos et archidiaconus Cantuariensis qui omnia premissa vidimus et tractavimus signa nostra apponi fecimus scripta etiam que fecit dominus electus et monachus cum examinarentur monachi similiter signavimus