Charter Document - 03350016
| Charter Number: | 03350016 |
|---|---|
| Cartulary Title: | Norwich 1244-1266 Volume 32 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1254 |
| Date type: | Internal, A.D. |
| Resource Link(s): |
|
Charter:
Walterus permissione divina Norwicensis episcopus negotii crucis executor a sede apostolica deputatus discretis viris celerario et sacriste de Esseby et iuratis de capitulo salutem in Domino Cum nuper a vobis sacramentum recepimus super estimatione proventuum vestrorum terrarum reddituum censuum et omnium aliorum bonorum vestrorum immobilium ad ecclesiam vestram spectantium maiorum et minorum absque fraude facienda exceptis proventibus ecclesiarum parochialium quas habetis qui per decanum debent estimari vobis in virtute obedientie qua sedi apostolice tenemini et sub religione sacramenti prefati iniungimus quatinus in hac parte fideliter vos habentes que sit estimatio omnium bonorum vestrorum supradictorum in scriptis fideliter redigatis et illam estimationem plene plane et dilucide per scripturam sigillo capituli vestri sigillatam nobis habere faciatis ad diem et locum infrascriptos Consulimus insuper ad vestram salutem et communem liberationem quod in taxationibus faciendis sic diligentes et veraces sollicitudine et facto vos habeatur non obstantibus aliquibus taxationibus prehabitis ne ex postfacto alii facta vestra et dicta scrutantes vos inveniant a via veritatis manifeste declinasse et in sententiam excommunicationis incidisse quam per sedem apostolicam in omnes illos qui scienter in dicta decima subtrahenda vel non solvenda fraudem commiserint promulgari demandatur Predictas autem estimationes in scriptis fideliter redactas nobis vel certo nuntio nostro sigillo capituli vestri signatas in abbatia sancti Iacobi iuxta Norhampton in crastino sancte Lucie habere faciatis Dat apud Suleby iii Idus Novembris anno gratie MCCL quarto