Charter Document - 03340089
| Charter Number: | 03340089 |
|---|---|
| Cartulary Title: | Ely 1109-1197 Volume 31 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1160 |
| Date type: | Assigned |
| Resource Link(s): |
|
Charter:
Alex[andro] Dei gratia summo pontifici domino et patri spirituali Nigellus Elyensis ecclesie humilis minister salutem et debitam in omnibus cum omni devotione subiectionem Conditori ac redemptori omnium licet insufficientes gratiarum referimus actiones qui mundo principe adacto menbra ipsius in ipso dampnavit capite et ecclesie unitatem quam suo redemit sanguine servavit illesam Prebuit immaculate sponse sue quasi parturienti post lamenta letitiam et pro votis omnium te pastore suscepto pressure preterite fecit immemorem Eiecta est iterum de domo patris ancilla cum filio suo et ipsum auctorem scelerum caput sibi constituit ecclesia malignantium Verum libera in patris hereditate sponso suo fetus producit multiplices et egregii piscatoris navicula tanto rectore secura nec minas equoris nec fluctus pertimescit invidie Valeat igitur in multo tempore rector iste cum navi cui presidet et in eternitatis littore videre mereatur appulsam Te sanctissime pater omnium tam cleri quam populi vota susceperunt et precipue sedi Romane devotissima Anglorum ecclesia cui tempore administrationis tue et pax pristina restauratur et diu sopita iura restituuntur ut etiam apostolatus tui tempore cui hoc divino nutu servatum est eidem ecclesie spiritualis iocunditas prestetur uberior pretiosam margaritam in ecclesia beati Petri apostolorum principis reconditam corpus scilicet beati Eduardi quondam Anglorum regis ibidem humatum de terra levare et condigna theca collocare fidelis devotio disposuit Hic ut scripturarum testimonio et veredicorum relatione didicimus ab ineunte etate sanctissime degens et regni tempora quod iure hereditario adeptus est inoffense legibus quas ipse condiderat per moderans mente et corpore virgo permanens diem functus est et in ecclesia beati Petri aput Westm[onasterium] quam a primis fundamentis construxerat magnifice collocatus ubi eius intervenientibus meritis multis innumera prestari creduntur beneficia Tibi igitur pater sanctissime una cum patre nostro spirituali T[eobaldo] Cant[uariensi] archiepiscopo et aliis coepiscopis nostris cum omni precum instantia supplicamus ut quod de glorioso et incorrupto eius corpore levando fideles in Cristo fratres nostri eiusdem loci abbas et monachi fideliter conceperunt annuatis et beati Petri apostolorum principis cuius sedem tenetis patrimonium sic sublimari concedatis