Charter Document - 03339002

N ego baptizo te in nomine patris et filii et spiritus sancti amen ut si inevitabilis necessitas forte emerserit quemquam per alium quam per sacerdotem oporteat baptizari ipsam formam sciant et valeant observare que si fuerit observata postmodum per sacerdotem ab hiis qui intererant inquiri precipimus diligenter ut si invenerit baptizantem discrete et debito modo baptizasse et verba expressa superius protulisse factum ratificat alioquin cum verum baptismum credi non debeat ubi verbum et elementum que necessario requiruntur deficiunt vel eorum alterum est omissum puerum ex toto incipiat baptizare Puer autem domi modo tradito baptizatus si convaluerit ad ecclesiam deferatur ut sequentia non precedentia immersionem per sacerdotem ut convenit suppleantur Vas etiam in quo extitit baptizatus ad usus ecclesie reservari precipimus vel comburi et aquam in qua mergebatur in ignem fundi vel ad ecclesiam in baptisterium propter reverentiam sacramenti deferri Ad elevationem vero pueri de sacro fonte per quam compaternitas spiritualis contrahitur masculis scilicet duo mares dumtaxat et una femina feminabus vero unus masculus et due femine dumtaxat admittantur et plures propter causas diversas tanquam testes si fieri valeat evocentur Et ut periculis crebro surrepentibus cautius obvietur precipimus quod mulieres pregnantes sepius moneantur ut cum partus sui tempus instare crediderint sacerdoti peccata sua confiteantur dum possint ne cum eas preoccupari contigerit confitendi facultas cum voluerint adimatur et aquam habeant promptam in partu ut puer si necessitas urgens compulerit sicut premisimus baptizetur Et moneantur etiam ne teneros pueros iuxta se de nocte presumant propter casus fortuitos collocare Item ut grex dominicus nobis commissus ab omni prorsus avertatur errore precipimus quod sacerdotes parochianos suos moneant ut qualibet ambiguitate remota in vigilia Pasce et Pentecostes diebus scilicet a sanctis patribus deputatis pueros suos ad baptizandum velut sortilegi non omittant deferre Doceant etiam sepius non solum presbiteri verum etiam quicunque clerici et laid pater et mater absque preiudicio copule coniugalis possunt in inevitabili necessitatis articulo parvulos baptizare Item cum sacramentum dici non debeat iteratum quod dubitatur fuisse collatum precipimus ut pueri expositi et alii de quorum baptismo potest probabiliter dubitari sive inveniantur cum sale sive non sub hiis verbis baptizentur Si es baptizatus non te rebaptizo set si non es baptizatus ego baptizo te in nomine patris et filii et spiritus sancti amen Precipimus etiam quod panni crismales ad seculares usus nullatenus set ad ecclesie usus convertantur