Charter Document - 03331059

De inmunitate ecclesie [C]um laicis licet religiosis de rebus ecclesiasticis quomodolibet disponendi nulla sit penitus attributa potestas seu facultas nonnulli tamen laici clericis opido infesti iura et res ecclesiasticas non verentur in sue dampnationis interitum usurpare Nos volentes ecclesiarum nostro regimini commissarum iura et libertates defendere et tueri districtius inhibemus ne laici res vel bona virorum ecclesiasticorum infra eorum loca vel solum ecclesie vel extra existentia aut herbam vel arbores in cimiterio cuiuscumque ecclesie parochialis vel capelle in nostris civitate vel diocesi Karln divino cultui deputate crescentes absque eorum licentia speciali capere prosternere auferre seu quicquam iuris in eis vendicare presumant nec etiam rectores vel vicarios aliqualiter impediant quominus easdem arbores et herbam prosternere falcare ammovere ac arbores huiusmodi in refectionem et reparationem ecclesie sue sive manerii proprii ad ipsam ecclesiam pertinentis libere convertere et de eis prout voluerint disponere valeant prout decet ita tamen quod in usus alios nullatenus convertantur Coniurationes insuper et conspirationes perversorum per quas oblationes fidelium subtrahuntur que alias ex devotione in exequiis mortuorum nuptiis seu purificationibus mulierum essent viris ecclesiasticis applicande fieri totaliter prohibemus Qui vero in premissis vel eorum aliquo secus egerint tam diu excommunicationis sententia innodentur et excommunicati publice nuntientur donec congrua satisfactione premissa beneficium absolutionis meruerint obtinere Et ut ecclesiastica magis timeatur censura generales sententie excommunicationis a iure et a legatorum in Anglia ac predecessorum nostrorum et nostris constitutionibus promulgate ter in anno in singulis ecclesiis nostrarum civitatis et diocesis Karln diebus solempnibus quibus magis expedire videbitur precipimus publicari proviso quod in publicatione huiusmodi excipiantur illi qui ante publicationem ipsam fuerint ab ipsis sententiis per eum qui hoc facere potuit in forma canonica absoluti