Charter Document - 03331055
| Charter Number: | 03331055 |
|---|---|
| Cartulary Title: | Carlisle 1133-1292 Volume 30 |
| Charter Language: | Latin |
| Charter Origin: | Religious |
| Charter Type(s): | Decree |
| Date: | 1258 - 1259 |
| Date type: | Assigned |
| Resource Link(s): |
|
Charter:
De ovibus sive animalibus ad diversa pascua transeuntibus [Q]uoniam ut audivimus super decimis de nutrimentis inter ecclesiarum rectores propter appulsiones pecorum ad diversas parochiarum pasturas contentiones multimode sepius oriuntur nos viam pacis preparare volentes statuimus quod in ecclesiis in quarum parochiis oves a tempore tonsionis continue pascuntur et cubant decime lane casei et lactis eiusdem temporis licet postmodum ammote fuerint et alibi tondeantur integre persolvantur Et ne fraus fiat in casu premisso statuimus quod antequam oves amoveantur a pascuis et etiam detrahantur eorum rectoribus sufficienter de solvenda decima caveatur Quod si infra predictum tempus ad diversarum parochiarum pascua transferantur quelibet ecclesia pro rata temporis decimam percipiat earundem minori triginta dierum spatio in rata temporis minime computando Si vero per predictum tempus incubant in una pastura et continue pascantur in alia inter ecclesias decima dividatur Decima quidem casei sive lactis de vaccis et capris proveniens si ubi cubant pascuntur ibi solvatur alioquin si cubant in una parochia et pascuntur in alia decima inter rectores dividatur vel dimidietur omnino Agni vero vituli hedi et pulli equitii habita ratione ad diversa loca ubi eduntur gignuntur et nutriuntur ad moram quam contraxerunt in eisdem partialiter decimentur Quid vero pro decima dari debeatur ubi lac propter paucitatem vaccarum vel ovium ad caseum faciendum non sufficit et pro agnis pullis equitiis velleribus aucis et aliis huiusmodi de quibus propter modicita tem eorum decima certa dari non potest consuetudini locorum duximus relinquendum Item precipimus quod si quis post festum sancti Martini oves occiderit vel si oves quovis casu fortuito moriantur decimam inde legitimam ecclesie solvere non postponant Et si oves extranee in alicuius parochia tondeantur decima lane ibidem tradetur rectori per se fideliter conservanda nisi sufficienter doceri possit quod de decima alibi fuerit satisfactum vel solutionem ibidem faciendam modo legitimo valeat impedire