Charter Document - 03331054

De prestatione decimarum [Q]uoniam in signum universalis dominii Dominus pro titulo speciali sibi decimas reservavit nos animarum periculis et ecclesiarum nostre diocesis dispendiis obviare volentes statuimus quod antequam bladum tempore messium decimetur nulla garba pro servitio vel quovis alio modo in fraudem ecclesie cuiquam assignetur Item quod decime sive semel sive bis prata falcentur ecclesie integraliter persolvantur et si qui pratum vel si quid aliud loco decime feni ecclesie asserant assignatum nisi illud probaverint evidenter ipsos super hoc nullatenus decernimus audiendos Et ne ecclesie iustis decimis defraudentur statuimus quod ecclesiis de pannagio satisfiet nisi sit loco redditus vel rector aut vicarius porcos suos quietos habuerint a pannagio ratione ecclesie et non feodi eiusdem Item et de pastura vendita nisi sit loco redditus et nisi vendatur parochianis propriis aut vicinis de quibus parochialis ecclesia habeat vel habere possit decimas de exitibus animalium ibidem pascentium secundum temporis quantitatem Item de lapidicina terra que coli solebat vel ad pasturam dimissa et de herba de prato proveniente negotiationibus meile molendinis ad ventum aquaticis fullinaciis et de omnibus aliis que per annum renovantur decime persolvantur Ceterum tamen in pluribus locis nostre diocesis quedam consuetudo immo potius corruptela inoleverit apud quosdam scilicet quod laici decimas ecclesiis debitas integre solvere contradicunt nisi prius a rectoribus preparentur convivia nos illud iuri intelligentes esse contrarium precipimus huiusmodi per censuram ecclesiasticam ad debitam decimarum prestationem non obstante consuetudine supradicta compelli pro omni hoc convivio vel munusculo circumscripto Preterea cum in negotiationibus et lucris manus hominis operatur ante solutionem decimarum expense necessarie secundum iura canonica sint ducende circa carucarios vel alios stipendiarios in diocesi nostra Karln aliis servientes et de laboribus manuum suarum pro vestimentis ac aliis preter victum cotidianum sibi necessariis modicam pecunie quantitatem per annum sibi acquirunt in sudore vultus sue panem suum commedentes statuimus ne prenominati stipendiarii ad solutionem decime ex huiusmodi modicis stipendiis que quinque solidorum quantitatem annuatim non excedunt in diocesi nostra decetero compellantur nolentes tamen per hanc nostram constitutionem ab oblationibus consuetis et in certis festivitatibus debitis huiusmodi stipendiarii ultra quinque solidos quantitatem nomine mercedis aliquid recipiant illud quod summam prenominatam excedit tantummodo decimetur