Charter Document - 03331043

De bonis ecclesie ad quem pertinent [Q]uoniam ipsum debent sequi onera quem sequntur et comoda statuimus ut si quis rector testatus die sancti Marci evangeliste vel post in fata decesserit cum ad ipsum fructus anni sequentis de episcopatus nostri consuetudine pertinere noscuntur exceptis feno prati pastura et alia terra cisera de dominico ecclesie que succedenti rectori ad annum sequentem pertineant reserventur de pensionibus si debeantur et aliis oneribus usque ad festum beati Marci sequens per executores suos plenius satisfaciant Item statuimus de eo qui fructus percipit si ante festum beati Marci contingat humanitus de eodem Si vero intestatus die prescripto vel post decesserit bona que mortis tempore fuerint inventa et fructus sequentis anni idest autumpni exceptis quibusdam ut prius in solutionem debitorum defuncti vel in alios pios usus per nos sicut expedire viderimus totaliter convertantur Et si ecclesie in quorumcunque rectorum decessu debitis careant ornamentis et libris precipimus quod de bonis ipsorum omnes suppleantur defectus et etiam edificia si necesse fuerit reparentur habita tamen ratione per quantum tempus ipsa beneficia tenuerunt Quacumque vero anni hora beneficiati decesserint fructus terrarum quas fecerint seminare in vita sua in usus ipsorum totaliter convertantur Et ne terras ecclesiarum dum vacant incultas iacere contingat precipimus quod per locorum decanos fideliter excolantur et ab eo qui fructus debet percipere sumptus recipiant competentes vel ad campi partem aut ad firmam secundum rationabilem terre consuetudinem per ipsos sicut expedire viderint excolende tradantur