Charter Document - 03331019

Ne ecclesie dignitates aut beneficia tradantur ad firmam [A]d hec districtius inhibemus ne dignitates vel officia puta decanatus vel archidiaconatus sive proventus ecclesiastice vel spiritualis iurisdictionis excercitio seu ex penitentia vel altari aut aliis sacramentis quibuslibet venientes ad firmam decetero concedantur Set nec quevis ecclesiastica beneficia sub quocunque colore tradantur vel recipiantur ad firmam sine auctoritate nostra et licentia speciali sicut in Oxon concilio statutum est Et si cuiquam ex causa gratiam fecerimus in hac parte inhibemus ne in aliena ecclesia tanquam stipendiarius audeat ministrare cum id certum sit cupiditatis indicium et id intentionis nostre non fuerit gratiam concedendo Item ut sacerdotum in vinea domini laborantium affectus magis excitetur ad bonum omnisque materia defalcandi amputetur precipimus quod ab ecclesiarum rectoribus facultatibus eorum pensatis oneribus etiam et yndempnitate ministrantium non exiliis ut hactenus set sufficiens et honesta sustentatio sibi tribuatur ne ipsos aut mendicare oporteat aut lucris illicitis inhiare Unde firmiter inhibemus ne sacerdotes in una missa plura officia decantare presumant quia id sine cupiditatis vitio posse fieri non videmus Set nec unus sacerdos plures missas una die celebrare attemptet nisi in die Natalis domini vel Pasche vel quando corpus presens in ecclesia propria fuerit tumulandum et hoc in ecclesiis que propter sui tenuitatem unum habere vix poterunt capellanum In aliis autem que diffusas habent parochias plures constitui precipimus sacerdotes et super hiis per nos vel per [] archidiaconum et [] officialem nostrum volumus ecclesiis provideri In aliena autem ecclesia propter corpus presens iterato celebrare sacerdoti cuilibet non licebit Inhibemus etiam ne sacerdotes parochiales annualia vel tricennalia propter stipendia sua recipiant ne dum ea perficere studeant ecclesia parochialis obsequiis debitis defraudetur Et ne promiscuis actibus rerum turbentur officia inhibemus ne diaconi confessiones audiant nec alia ministrent officia que solis sacerdotibus sunt concessa Volumus etiam ne quorum cupiditas devotionem simplicium retrahat et obfuscet quod in ecclesiis que scolis civitatum vel castrorum nostre diocesis sunt vicine aque benedicte solis scolaribus assignentur