Charter Document - 03331001

[Q]uoniam sanctitudo decet domum Dei que verbo vite mundata et abluta sanguine Iesu Cristi maculam non trahat a semetipsa ad propellendam omnem vite spurcitiam ab hiis qui se suis ministeriis manciparunt ne sponsam Cristi quam custodire tenentur infament et in ipsis scandalum patiatur per quos debet honoribus preveniri predecessores nostros huic sancte sedi ordinate in Domino presidentes plurimum laborasse et salubria quedam ad morum reformationem statuta studiosius novimus edidisse Set quoniam humani generis inimici nunquam cessat astutia virtutum picturis superducere feditatem ut perfectos in domo Dei quos imperitos repperit vel incautos deiciat quorum constantia vita subvertitur subditorum et sic mandata Dei transgredi ac sanctorum patrum regulis et statutis ipsos faciat contraire nos ipsius versuti hostis insidiis zelo gregis nobis commissi obviare summo opere cupientes predecessorum nostrorum vestigiis inherendo statuta quedam divino suffulti presidio ac presentis synodi sacrosancte intervenientis consilio et assensu ad ecclesie Dei ornatum et filiorum ipsius edificationem communem salubriter duximus promulganda que salvis omnibus statutis Laterani et Oxonii conciliorum ac London concilii per pie recordationis Otonem quondam sancte Romane ecclesie cardinalem et apostolice sedis legatum in Anglia celebrati precipimus observari