Charter Document - 03330201

Charter Document - 03330201


Charter Number: 03330201
Cartulary Title: Carlisle 1133-1292 Volume 30
Charter Language: Latin
Charter Origin: Religious
Charter Type(s): Confirmation
Date: 1287
Date type: Internal, A.D., Calendar, Episcopal
Resource Link(s):

Charter:

Universis sancte matris ecclesie filiis audituris presentes litteras vel visuris Rad[ulphus] miseratione divina Karl episcopus salutem in Domino sempiternam Dilecti in Cristo filii abbas et conventus Vallis Magdalene de Hepp nostre diocesis sua nobis petitione humili supplicarunt ut paupertati domus sue affectu compatientes paterno ipsis et domui abbathie sue de Hepp ecclesiam parochialem de Hepp et ecclesiam de Bampton in Westm sibi a predecessoribus nostris in usus suos proprios inperpetuum capituli Karl accedente consensu legitime confirmatas facta ipsorum predecessorum nostrorum ratificantes confirmare caritatis intuitu dignaremur Nos igitur predecessorum nostrorum vestigiis inherentes religionem et hospital[itatem] suam et alia nonnulla honestatis quibus luculenter decorantur insignia attendentes inspectis etiam patronorum suorum cartis et predecessorum nostrorum confirmationibus ac capituli Karli assensu scripto dicti capituli roborato eorum precibus favorabiliter duximus annuendum Unde nos predictas ecclesias parochiales de Hepp et de Bampton cum omnibus iuribus et pertinendis earundem memoratis abbati et conventui ac domui sue predicte in usus suos proprios concedimus inperpetuum pro nobis et successoribus nostris integraliter possidendas et presentis scripti nostri munimine confirmamus defectum concessionum confirmation[is] predecessorum nostrorum si quis sit quatenus possumus ex potestate dioc[esana] supplentes salvo nobis et successoribus nostris iure diocesano in ecclesiis prelibatis Habentes iterum respectum ad paupertatem eorum et affectu pietatis compatientes eisdem concedimus pro nobis et successoribus nostris ut liceat eis per duos canonicos suos vel tres in predictis ecclesiis deservire sicut hactenus consueverunt quorum unus nobis et successoribus nostris presentetur vicarius qui nobis et successoribus nostris tam de episcopalibus quam de spiritualibus valeat respondere alter vero eis de temporalibus satisfaciet ita tamen quod in qualibet ecclesia habeant unum capellanum secularem qui confessiones audiant et alia faciant que per ipsos canonicos decenter expediri non poterunt et honeste In cuius rei testimonium has litteras sigilli nostri inpressione fecimus roborari Dat apud Ros vi nonas Iulii anno Domini mcc octogesimo septimo et pontificatus nostri octavo