Charter Document - 03330174

Universis sancte matris ecclesie filiis ad quorum notitiam pervenerit hec scriptura Rad[ulphu]s miseratione divina Karl episcopus salutem in eo quem genuit puer pura singularis salutaris Ecclesiasticorum proventuum dispensatio prudenter et fideliter administrata per quam ministrorum ecclesie in creatoris preconia voces continuas extollentium et precipue sacerdotum divina celebrantium numerus augmentatur insuper et iuniorum scolarium literarum studiis ab evo primario deditorum indigentie subvenitur inducit complacentiam et efficit gratiam Salvatoris peculiariter promereri Hinc sequitur quod effrenata cupiditas quorundam ad divitias numerosas anhelantium ac modicum de spirituali profectu curantium decenter reprimitur et in conventibus catholicorum dignitas regis regum attenditur cum contra serpentis antiqui versutias devotus crescat exercitus bellatorum Cristo per suos milites reverentius famulatur ac decus ecclesie ac clericalis ordinis celsitudo vehementius decoratur Ea propter affectantes divine laudis cultum in ecclesia parochiali beate Michaelis de Dalston nostre diocesis ad nostrum patronatum spectante venerabiliter ampliare advertentes etiam terras fructus et obventiones ecclesie predicte que in usus unius rectoris solummodo cedere consueverunt ad sustentationem posse sufficere plurimorum solempni tractatu et diligenti prehabito consentiente et favente domino Iohanne de Berdefeld tunc rectore ecclesie memorate ac se et ecclesiam suam nostre ordinationi totaliter submittente In nomine sancte et individue Trinitatis ad honorem eiusdem gloriose Virginis Marie beati Michaelis archangeli et omnium sanctorum auctoritate diocesana de terris fructibus et obventionibus ecclesie prefate cum omnibus pertinendis et aysiamentis ad eam qualitercumque spectantibus irrefragabiliter ordinamus quod perpetuis temporibus de bonis predictis tres fiant et sint decetero portiones quarum unam assignamus perpetuo vicario qui pro tempore fuerit in eadem ecclesia continue ministranti et residenti qui curam totius parochie predicte suscipiat habeat et agnoscat aliam portionem archidiaconatui Karl propter evidentem ipsius exilitatem annectimus tertiam vero portionem ad sustentationem duodecim pauperum scolarium per nos et successores nostros eligendorum propter honorem et utilitatem ecclesie nostre Karl in civitate Karl studio applicandorum caritatis intuitu assignamus Et has duas portiones ultimas volumus appellari et esse simplicia beneficia vel prehendas quarum portionarii seu prebendarii a prestatione omnimodarum decimarum sint inmunes inperpetuum et quieti Que quidem portiones tales sunt vicarius perpetuus eiusdem ecclesie qui pro tempore fuerit habeat et percipiat capitale edificium cum omnibus suis pertinentiis item omnes proventus altaragii item omnes decimas minutas totius parochie exceptis duabus portionibus ultimis supradictis preter decimam feni de qua tamen habeat decimas fenorum de Magna Dalston et Parva Dalston et de dominico prato nostro in Cartheumyre item omnes terras dominicas ad ecclesiam spectantes cum suis pertinentiis et aysiamentis absque prestatione decimarum preter sexdecim acras in Brakanhou in territorio ville de Unthanck et preter grangiam decime de Raghton et preter tofta et crofta que iacent inter terras Willelmi filii Ade et Rogeri Warde et preter tofta et crofta que iacent propinquius tofto et crofto Symonis Scort versus occidentem item omnes decimas maiores ville de Magna Dalston Idem vicarius supportabit omnia onera ordinaria debita et consueta Ornamenta libros et reparationes altaris et cancelli propriis sumptibus sustinebit ac unum presbiterum et unum subdiaconum sufficientes et ydoneos preter seipsum in eadem ecclesia continue ministraturos exhibebit et personaliter ibidem continue residebit Archidiaconus qui pro tempore fuerit habeat et percipiat in eadem ecclesia duo tofta que iacent inter terram Willelmi filii Ade et Rogeri Warde in Magna Dalston et sexdecim acras terre arabilis in Brakanhou in territorio ville de Unthanck et grangiam decime de Raghton cum omnibus pertinentiis et aysiamentis et omnes decimas bladorum et feni villarum sitarum ultra rivum de Caldeu versus orientem item decimam feni ville de Cartheu Idem vero archidiaconus inveniet in ipsa ecclesia unum presbiterum sufficientem et ydoneum suis sumptibus secundum formam nostre ordinationis continue ministrantem et in toftis superius sibi assignatis edificia honesta construet in quibus idem cum venerit decentius hospitari et capellanus eiusdem continue valeat receptari Scolares qui pro tempore fuerint habeant et percipiant tria tofta que iacent propinquius tofto et crofto Symonis Scort versus occidentem omnes decimas garbarum et feni baron[ie] de Dalston a rivo de Caldeu versus occidentem tam in nostris dominicis quam aliis preter decimas garbarum de Magna Dalston et preter decimas fenorum de Magna Dalston et Parva Dalston et de dominico prato nostro in Cartheumire et de prato ville de Cartheu Iidem vero scolares invenient unum presbiterum sufficientem et ydoneum in ipsa ecclesia sumptibus suis propriis secundum ordinationem nostram continue ministrantem et in toftis sibi superius deputatis sufficientes domos construent in quibus eorum presbiter possit morari Insuper et quatuor ex ipsis diebus dominicis et festivis ad eandem ecclesiam teneantur venire nisi aeris intemperie vel alia legitima causa fuerint prepediti Volumus etiam et ordinamus quod presbiteri archidiaconi et scolarium in ipsa ecclesia de Dalston pro tempore ministrantes vicario eiusdem et suis successoribus infra ecclesiam in obsequiis divinis subsint et obediant humilter et devote quorum unus missam de beata Virgine et alius missam de defunctis vicissim celebret horis et tempore oportunis ipso vicario vel suo presbitero de die cotidie celebrante Volumus insuper quod huius ordinationis nostre sub nobis et successoribus nostris archidiaconus qui nunc est ac successores sui curam patrocinium et tutelam habeant et prestent inperpetuum Vicarius autem et scolares predicti archidiaconis memoratis in hiis que ordinationis huiusmodi defensio exigit et requirit fideliter teneantur assistere et devote parere Set et vicarius in prima sua institutione corporale sacramentum prestare tenebitur se presentem ordinationem inviolabiliter conservaturum et nullatenus contra venturum Volumus ergo et concedimus pro nobis et successoribus nostris hanc nostram ordinationem in omnibus suis articulis secundum tenorem superius annotatum omni tempore valituram robur optinere perpetue firmitatis Et in huius ordinationis evidentiam pleniorem hanc scripturam per nostri sigilli appensionem fecimus communiri Et magister Ricardus tunc archidiaconus Karl et Thomas de Leycestr tunc perpetuus vicarius ecclesie de Dalston singuli pro se et successoribus suis hoc scriptum signorum suorum munimine roborarunt Act in ecclesia parochiali de Dalston nono kalendas Martii anno Domini mcc octogesimo quarto et pontificatus nostri quinto