Charter Document - 03330164

R miseratione divina Karl ecclesie minister humilis dilectis in Cristo filiis de Kyrk de Neubygg et de Kyrkebithore ecclesiarum presbiteris parochialibus salutem gratiam et benedictionem Nonnulli iniquitatum filii sicut intelleximus accedentes ad molendinum de Culgayth et aquam per quam idem molendinum molere consuevit puram et perpetuam elemosinam domini abbatis sancte Marie Ebor et monachorum de Wederhal parietes eiusdem molendini et rotas et stagnum quoddam eorundem monachorum factum ad conservationem dicte aque temere diruerunt et quo voluerunt contra iustitiam asportaverunt in animarum suarum periculum scandalum plurimorum et preiudicium dictorum monachorum non modicum et gravamen ob quod delictum excommunicationis sententiam latam per constitutionem domini legati nuper in Anglia existentis in malefactores huiusmodi incurrerunt Hinc est quod vobis mandamus firmiter iniungentes quatinus ad ecclesiam de Kyrkeland per litteras accedentes ibidem tribus diebus festivis moneatis in genere et efficaciter inducatis omnes dirutores ac asportatores predictos et alios quoscunque qui dampna aliqua prefatis monachis in dicto molendino vel aqua intulerint quominus idem molendinum molere possit prout consuevit eorumque auctores et fautores ut domino priori de Wederh qui quo ad hoc pro predicto abbate est in partibus istis et monachis de Wederhal infra quindecim dies a dat[o] presentium de predictis commissis satisfaciant competenter quod si facere contempserint aut non fecerint ex tunc eosdem dirutores asportatores dampna alia predicta inferentes auctores et fautores eorum in dictam sententiam excommunicationis denuntietis singulis diebus dominicis et festivis in genere sollempniter et pupplice innodasse Ad hec quia dicti prior et monachi prefatum molendinum nituntur reficere et aquam purgare ac timeant sibi impedimentum in futurum per aliquos latenter in predictis quominus ea compleant ut deberent vobis mandamus ut prius quatinus in dicta ecclesia vice et auctoritate nostra pupplice inhibeatis omnibus et singulis sub pena excommunicationis in eos ferende si impedimentum aliquod prestiterint ne impedimentum aliquod prestent nec prestare volentibus consentiant Et si qui non obstante prohibitione nostra impedimentum aliquod prestiterint in premissis quominus opus predictum effectui debito mancipetur eosdem impedientes et eisdem consentientes auctoritate nostra excommunicationis vinculo generaliter innodetis Inquirentes nihilominus prefatorum dirutorum asportatorum et alia dampna predicta inferentium auctorum fautorum impedientium et eis consentientium et cum ea inveneritis citetis eos peremptorie quod compareant coram nobis vel commissariis nostris in crastino sancti Marci ewangeliste in Karln ecclesia cathedrali priori et monachis super prefatis commissis responsuri et statim in eo quod iuris ratio suadebit Et quid de premissis feceritis nobis vel commissariis nostris per litteras vestras patentes harum seriem continentes ad dictos crastinum et locum fideliter intimetis Dat apud Rosam xvi kalendas Aprilis anno Domini mcclxx quarto