Charter Document - 03330064
| Charter Number: | 03330064 |
|---|---|
| Cartulary Title: | Carlisle 1133-1292 Volume 30 |
| Charter Language: | Latin |
| Charter Origin: | Religious |
| Charter Type(s): | Restoration |
| Date: | 1219 - 1223 |
| Date type: | Assigned |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Hugo Dei gratia Karl episcopus salutem in Domino Cum ad sollicitudinem pertineat episcopalem iura religiosorum conservare illesa ac ex pietatis officio redintegrare confracta ipsorum tenemur iura propensius confovere in quibus disciplina viget regularis et hospitalitatis gratia servatur Eapropter cum magister Ernaldus de Auclind qui ecclesiam de Crosseby Ravenswart de donatione I illustris regis Anglorum ratione custodie abbatie de Wyteby tenuerat in fata concessisset venerabilis vir I abbas de Wyteby cartam bone memorie E predecessoris nostri et confirmationem felicis recordationis R archiepiscopi Ebor nobis exhibuit qui ecclesiam prelibatam cum omnibus pertinentiis suis monasterio sancti Petri et sancte Hilde de Wyteby et monachis ibidem Deo servientibus concedunt et confirmant necnon et cartam Roberti tunc temporis archidiaconi qui eos in corporalem possessionem induxerat ecclesie memorate humiliter supplicans et devote ut permitteremus eosdem ecclesiam prelibatam pacifice possidere asserens quod vacante ecclesia de Wyteby dictus magister Er[naldus] ecclesiam optinuerat memoratam Nos igitur attendentes ecclesiam de Crosseby Ravenswart ad abbatem et monachos de Wyteby pertinere pleno iure ipsorum indempnitati paterno affectu precaventes ne eis vertatur in preiudicium quod ecclesia prememorata dicto magistro Er[naldo] fuerat concessa et diutius possessa ab eodem quod quidem in ecclesie de Wyteby emormem videbatur redundare lesionem possessionem ecclesie prememorate cum suis pertinentiis de virorum discretorum consilio ac capituli nostri assensu redintegravimus predecessoris nostri inherendo vestigiis ipsam ecclesiam cum suis pertinentiis in usus proprios eisdem concedentes et ne alicuius tergiversatione vel versutia ius quod habuerunt et habent in ecclesia memorata monachi prelibati in dubium valeat de cetero devocari presentes litteras sigillo nostro munitas eisdem concessimus approbantes et confirmantes ut monachi prelibati ecclesiam memoratam teneant et possideant in usus proprios cum omnibus pertinentiis suis perpetuis temporibus salvo nobis et successoribus nostris iure episcopali in omnibus Hiis testibus domino Bartholomeo priore Karl domino Suffredo priore de Wederhal L quondam priore de Giseburn I sacrista de Giseb magistro A officiali et A decano Karl A persona de Stratford A et S canonicis de Wart R vicario de Bridekirke et multis aliis