Charter Document - 03330047
| Charter Number: | 03330047 |
|---|---|
| Cartulary Title: | Carlisle 1133-1292 Volume 30 |
| Charter Language: | Latin |
| Charter Origin: | Religious |
| Charter Type(s): | Declaration |
| Date: | 1220 |
| Date type: | Assigned |
| Resource Link(s): |
|
Charter:
Universis Cristi fidelibus ad quos presentes littere pervenerint Hugonis Dei gratia Karl episcopus eternam in Domino salutem Noverit universitas vestra quod cum constituti simus ut ecclesiastice puritatis semina plantemus et edificamus et que contra canonicas sanctiones in nostra dioecesi facta cognoverimus evellamus et destruamus attendentes diligentius periculum animarum abbatis et fratrum de Holm ex una parte et prioris de Lanercost et capituli sui ex alia super quadam collusione que facta fuit inter eos cum questio verteretur hinc et inde de iure patronatus ecclesie de Burgo et per ignorantiam canonum quamvis grassam et supinam predicti fratres de Holm et de Lanercost ad quandam compositionem adinvicem se obligassent et quasi transigentes ubi transigere non licuit illi de Holm pro pacifica possessione predicte ecclesie iam dictis priori et capitulo de Lanercost annuatim quinque marcas argenti solvere tenerentur secundum formam illicite transactionis quam inter se facere presumpserant Nos diligentius super hiis inquisita veritate et pensata tanti excessus qualitate ad hoc utramque partem monitis salutaribus induximus ut resignatis in manu nostra omnibus conditionibus et cartis hinc inde confectis super hiis nostram reportarent sententiam et eam perpetuo irrefragabiliter observarent Ipsis autem in nostra presentia constitutis abbate scilicet et quibusdam de fratribus suis et priore et quibusdam canonicis suis cum litteris de rati habitatione capitulorum de Holm et de Lanercost et per iuramentum eorum qui personaliter coram nobis comparebant eadem rati habitatione firmata nos de consilio plurium prudentum et bonorum virorum quia plene nobis constitit quod ius patronatus eiusdem ecclesie de Burgo abbas et fratres de Holm canonice fuerant adepti et ideo iniustum erat ut predicti prior et capitulum de Lanercost aliquid inde percipient pro iure patronatus quod sibi vendicabant sed de iure consecuti non fuerant cum etiam si illud iuste possiderent plus nequibant inde consequi quam patronus inde habuit qui nil penitus percipere consuevit predictam compositionem de voluntate partium penitus irritavimus a prestatione illarum quinque marcarum annuatim illi de Lanercost solvendarum abbatem et fratres de Holm per sententiam diffinitivam perpetuo duximus absolvendos sepe dictis priori et capitulo de Lanercost perpetuum super hiis silentium imponentes Acta sunt hec anno gratie MCCXXX Hiis testibus priore de Gyseburne []