Charter Document - 03330002
| Charter Number: | 03330002 |
|---|---|
| Cartulary Title: | Carlisle 1133-1292 Volume 30 |
| Charter Language: | Latin |
| Charter Origin: | Religious |
| Charter Type(s): | Consent |
| Date: | 1138 |
| Date type: | Assigned |
| Resource Link(s): |
|
Charter:
In nomine patris et filii et spiritus sancti amen Ego Adeloldus Dei miseratione Carlolensis episcopus tam futuris quam presentibus Carlolensis ecclesie fratribus in perpetuum Pontificalis interest officii que ad honorem et laudem Dei pertinent cum omni devotione sublimare et canonica sanctorum patrum instituta diligenti studio roborata pro viribus a Deo collatis effectui mancipare Nos igitur Deo auctore Carlolensi presidentes ecclesie fratribus nostris in eadem ecclesia sub regula beati Augustini communiter victuris et secundum statuta sancti Nicholai de Aroasia humiliter Deo servituris priorem faciendi de fratribus suis vel de aliis eiusdem constitutionis ecclesiis liberam electionem concedimus et ut obedientiam prius nobis promissam ei denuo promittant et in omnibus salva obedientia nostra exhibeant pontificali auctoritate precipimus Adicimus quoque precipientes ut idem prior ad capitulum sancti Nicholai sequenti anno nisi canonica excusatione premissa proficisci non negligat ubi que ad ordinem pertinent a pluribus auditis et que corrigenda sunt diligenter correctis in ordinis sui tenore fervescat Sane si idem prior aliquando quod absit ordinis sui neglector apparuerit et ad nos adductus et secretius correctus nisi emendari voluerit congregatis abbatibus eiusdem ordinis aliisque religiosis personis in capitulo suo deponetur et alius iuxta prefatum ordinem electus loco eius substituetur depositus vero ad ecclesiam unde prius venerat remittetur Ut autem hoc statutum firmum et stabile faceremus presentibus dominis et fratribus Alviso Atrebatensi et Milone Morinensi honestis et religiosis presulibus sigilli nostri impressione roboravimus