Charter Document - 03320211
| Charter Number: | 03320211 |
|---|---|
| Cartulary Title: | Durham 1241-1283 Volume 29 |
| Charter Language: | Latin |
| Charter Origin: | Religious |
| Charter Type(s): | Indulgence |
| Date: | 1275 |
| Date type: | Internal, Calendar, Episcopal |
| Resource Link(s): |
|
Charter:
Omnibus Cristi fidelibus ad quos presens scriptum pervenerit Robertus dei gratia Dunelmensis episcopus salutem in domino Inter preclaros Cristi confessores quorum presencia corporalis Anglicane patrocinatur ecclesie beatus Cuthbertus non mediocre sanctitatis preconium dinoscitur optinere nec inmerito laudibus humanis attollitur cuius meritis infirmi sanitatis graciam consequuntur cuius caro carie carens et prorsus integra perseverans dormientem pocius quam mortuum representare videtur membra namque beati viri incorrupta penitus manere non solum venerabilis Bede presbiteri scriptura et testatur verum etiam quam plurimum sanctorum asserunt testimonia et ipsius sanctissimi corporis translatio evidentissime comprobavit Nos igitur tanti confessoris considerantes insignia de dei misericordia et gloriose virginis Marie beatorum apostolorum Petri et Pauli ac omnium sanctorum confidentes suffragiis omnibus de peccatis suis vere contritis et confessis qui ad feretrum eius devocionis et et orationis causa advenerint et de bonis sibi a deo collatis feretro suo cum devotione attulerint de iniuncta sibi penitentia quadraginta dies misericorditer relaxamus in perpetuum omnes etiam indulgentias a predecessoribus nostris seu aliis episcopis predicto feretro rite concessas confirmantes Datum apud Myddelham xiii kalendas Martii pontificatus nostri anno primo