Charter Document - 03320205
| Charter Number: | 03320205 |
|---|---|
| Cartulary Title: | Durham 1241-1283 Volume 29 |
| Charter Language: | Latin |
| Charter Origin: | Religious |
| Charter Type(s): | Certification |
| Date: | 1278 |
| Date type: | Internal, A.D., Episcopal |
| Resource Link(s): |
Durham Cathedral Archive - Register I (fii18r) Durham Cathedral Archive - Misc.Ch.6112 |
Charter:
Universis Cristi fidelibus ad quos presens scriptum pervenerit Robertus permissione divina episcopus Dunelmensis salutem in domino sempiternam Conventionem et compositionem inter Walterum rectorem ecclesie de Cestria nostre dioecesis pro se et ecclesia sua predicta ex parte una et dominum Guichardum de Charron et Isabellam uxorem eius pro se et heredibus ex ipsis exeuntibus factas ex altera super communa pasture in Tamehouse et omnibus aliis clausis que iidem dominus Guichard et Isabella habent de dono nostro in Heddelyside et Caldesete in quibus aliquo tempore predecessores dicti rectoris in herbagio solebant communicare et super duobus croftis et quatuor acris terre que dicti dominus Guichardus et Isabella rectori et ecclesie predictis pro compositione huiusmodi inperpetuum contulerunt quibus personaliter interfuimus et tamquam testis ad commodum et utilitatem prefate ecclesie de Cestria consensum et auctoritatem adhibuimus necnon et super oratorio in manerio dictorum domini Guichardi et Isabelle de Bewmese erecto et inposterum habendo secundum tenorem instrumentorum super premissis omnibus inter partes huiusmodi confectorum ratas et firmas habentes eas deliberatione habita pleniori auctoritate pontificali tenore presentium confirmamus et presentis scripti patrocinio communimus sigillum nostrum apponi facientes in testimonium premissorum Datum apud Bedelington anno domini MCCLXX octavo et pontificatus nostri anno quarto