Charter Document - 03320129

Robertus permissione divina episcopus Dun dilecto speciali in Cristo filio Hugoni priori ecclesie Dun salutem gratiam et benedictionem Illorum quieti precipue credimus insistendum qui sibi labores voluntarios elegerunt ut quietem aliis prepararent Et cum onera proximorum alter alterius portare ex precepto dominico teneamur si legem Cristi cupimus adimplere illorum supportationi merito credimus insistendum qui aliis in suis necesitatibus misericorditer fortiter et infatigabiliter supportarunt Sane porrecta nobis tua petitio continebat quod cum tu per xxx annos continuos supportans iugum professionis monastice in monasterio Dun iam per xiiii annos inter sevientis mundi turbinas et procellas prioratus ibidem fugens officio supportatione huius sarcine fatigatus atque tot et tantis fatigatus laboribus demum infirmitate gravi et incurabili ut creditur sis confectus adeo ut iminenti oneri fere succumbens te decetero impotentem et insufficientem asseras ad regimen prioratus cessionem tuam admittere et tibi tuisque sociis seu fratribus tecum victuris atque honeste familie ad subministranda vite necessaria iuxta tante persone conditiones et merita de facultatibus monasterii providere misericorditer curaremus Nos vero etsi sit nobis triste quod loquimur et flebile atque durum concedere quod urgemur ne tamen te decetero prioratus regimini insistente tua impotentia quod tu etiam merito reformidas in proprium necnon et tibi commissi gregis dispendium valeat redundare laborum tuorum requiem tibi parare et impotentie tue tuisque canis parcere cupientes predictis de causis tuis annuentes precibus tuam admittimus cessionem te a cura seu vinculis prioratus ipsius quo actenus tenebaris obnoxius penitus absolventes Tuam quoque a die ingessus tui in ipso monasterio conversationem absque nota laudabilem onera etiam quasi importabilia que indefesso studio et iugi vigilantia pro utilitate et directione ipsius monasterii tuis alligasti humeris baiulanda necnon et labores eximios et ingentes efficaces et utiles quibus seu per quos ipsum monasterium in spiritualibus et temporailbus ultra omnes predecessores tuos mirabiliter augmentasti cum diligentia advertentes attendentes nichilominus equm esse agricolam de suis fructibus debere suscipere et dignum esse mercennarium sua mercede iustum esse decrevimus ut tibi et tuis sociis seu fratribus tecum victuris congrua portio atque sufficiens iuxta tua preclara merita pro sustentatione honesta quoad vixeris assignetur Estimatis igitur facultatibus ad ipsum monasterium spectantibus bonis etiam ponderatis et diligenter consideratis que ipsi monasterio per tuam sollerciam et diligentiam tuis temporibus excreverunt habito etiam diligenti tractatu cum fratribus et commonachis tuis quos vices ipsius monasterii plenius nosse congnovimus nobis etiam assidentibus litteratis viris providis et honestis de expresso consensu et unanimi voluntate totius conventus super hiis specialiter requisito pro sustentatione moderata congrua et honesta ordinamus providemus et tibi quoad vixeris assignamus omnes et singulas decimas garbarum totius parochie de Alverton Ebor diocesis cum domibus de la Neuland iuxta Estrington et omnes et singulas decimas garbarum totius parochie de Acley Dun diocesis necnon et manerium de Wivestow cum molendino eiusdem ville et pastura et cum operationibus debitis manerio et quod plenum habeas cariagium ad bladum cariandum quod crescit in dominico eiusdem loci ceteris cariagiis domui Dun remanentibus loca insuper de Mukligwic et [de] Wardeley contemplationi congrua et quieti que tu non absque magnis laboribus edificasti cum pastura et omnibus eorum pertinentiis et utilitatibus una cum veteri vivario de Ketton tibi et tuis usibus assignamus ita quod prior Dun qui pro tempore fuerit de boscis dictorum locorum salva tibi ut prediximus pastura ordinet et percipiat prout domui Dun viderit expedire Volumus etiam ut bladum quod crescit apud Wardeley ad molendinum de Hethrewrth libere et sine multura molere possis de bosco vero de la Haying ad edificationem tantum et de veteri bosco de Hewrth ad comburendum et ad alia tibi neccessaria percipias Et ut hec nostra ordinatio provisio et assignatio tua perpetuo robur optineat firmitatis presens scriptum sigilli nostri munimine una cum sigillo capituli Dun de expressa et unanimi voluntate totius conventus fecimus communiri Dat et act Dunelmi vi id Ianuarii anno domini MCCLXXII