Charter Document - 03320093

Excellentissimo domino suo H[enricus] dei gratia regi Anglie illustri domino Hibernie duci Norm[annie] Aquit[anie] et comiti And[egavie] W[alterus] eadem gratia Ebor archiepiscopus Anglie primas et W[alterus] et S[ilvestrus] dei permissione Dunolm et Karl episcopi salutem in eo cuius gratia reges regnant Majestatis potestas regie et habita ad personam vestram affectio merito specialis nos admonent et inducunt ut ea que ad vestri honoris et commodi incrementum faciunt affectantes votis vestris quantum cum deo possumus annuamus Receptis igitur dudum litteris apostolicis et vestris cum reverentia et honore quos decuit de gratia nobis a domino papa concessa convocavimus prout serenitati vestre scripsimus in conventione super hoc habita apud Blidam singuli in nostris dioecesibus ad certos terminos clerum nostrum et cum quanta potuimus diligentia induximus convocatos ut in maturationem vestri negotii consentirent A quibus licet sub verbis variis responsum recepimus subnotatum videlicet quod cum dictum negotium totam tangat ecclesiam Anglicanam ac in talibus communis inter clerum utriusque provincie Ebor videlicet et Cantuar consueverit tractatus haberi antequam certum daretur responsum a modo illo recedere non credunt esse congruum vel honestum et ideo pretermisso tali tractatu differunt respondere quo habito respondebunt ut asserunt secundum quod dederit eis deus ecclesie vestris et regni nostri utilitatibus communiter ponderatis Dat Ebor ii id Septembris anno domini millesimo ducentesimo quinquagesimo secundo Valeat dominatio vestra per tempora longiora