Charter Document - 03320036

Nicholaus dei gratia Dunelm episcopus omnibus sancte matris ecclesie filiis presens scriptum visuris vel audituris eternam in domino salutem Cum per celebris memorie Philippum quondam Dunelm episcopum predecessorem nostrum hospitalis de Alverton fundatorem atque predecessores nostros alios bona quedam tam ecclesiastica quam secularia eidem hospitali ad opus pauperum transeuntium seu ibi commorantium sint collata dictique hospitalis et fratrum atque custodum eiusdem ordinatio ipsorum predecessorum nostrorum morte interveniente hucusque extitit prorogata nos ipsius hospitalis ac rerum eiusdem compensando facultatem de consilio virorum discretorum ac zelum dei habentium in nomine sancte et individue Trinitatis de dicto hospitali fratribus atque custode ordinavimus et statuimus in hunc modum In domo siquidem hospitalis predicti unus sit procurator idoneus et deo devotus residens in eadem qui custos eiusdem dicatur et ipsius negotia fideliter ac diligenter iuxta prudentiam totis viribus procurabit stabitque cum uno serviente et tribus equis et duobus garcionibus Erunt et in eodem hospitali duo capellani honesti cum duobus clericis unus etiam pistor et brisiator cum uno garcione et unus cocus cum uno garcione quinque fratres sani sive clerici sive laici qui habebunt habitum et regulam fratrum de Kypier quorum unus sit ianitor et procurator pauperum singulis noctibus recipiendorum alius vero sit claviger dispense et buteler Tertius autem sit lardarius hortolanus et gardinarius Quartus siquidem sit custos wannagii et granarius Quintus vero sit procurator infirmorum in lectulis et distributor relliquiarum Quod si aliquid fuerit inventum delicatum distribuatur inter infirmos decumbentes in lectulis magis indigentes Sint et ibi tres sorores que habeant similiter habitum et regulam sororum quarum due gerant curam infirmorum in lectis cum nocte fuerit et aliis temporibus intendant aliis utilitatibus domus Sint et ibi in infirmaria tresdecim infirmi in lectulis et humaniter sustententur in lectis cibariis et aliis donec convaluerint vel humanitus contigerit de eisdem Cum autem contigerit aliquem de predictis infirmis discedere alius in loco suo sine mora succedat si sit qui indigeat vel caritatem petat Singulis autem noctibus admittantur ad portam hospitalis triginta pauperes et ibidem habeant dimidiam panem et potagium Et si quis ita debilis fuerit et infirmus quod recedere non possit tam infirmorum quam pauperum tanti ponderis sit quod de quarterio frumenti fiant decies viginti panes Et cum in possessionibus immobilibus vel redditibus contigerit dictum hospitale augmentari secundum quantitatem eiusdem augmentationis elemosina pauperum transeuntium suscipiendorum ad partem suscipiat incrementum secundum arbitrium eiusdem procuratoris et similiter elemosina infirmorum in lectis decumbentium liberam autem potestatem nobis et successoribus nostris in eo reservamus visitandi et corrigendi volentes et statuentes ut in omnibus dignitas et auctoritas nostra et successorum nostrorum et ecclesie Dunelm plenius salvetur Ipsum siquidem quem per nos vel successores nostros ad dicti hospitalis custodiam seu procurationem pro tempore contigerit assignari eiusdem hospitalis esse volumus et dici custodem ac per ipsum officium boni ac veri adimpleri custodis Et ne id quod per nos in hac parte actum est in dubietate futuris temporibus labatur presenti scripto sigillum nostrum fecimus apponi Act apud Alverton in vigilia apostolorum Simonis et Iude anno gratie millesimo cc xliiii