Charter Document - 03300059
| Charter Number: | 03300059 |
|---|---|
| Cartulary Title: | York 1189-1212 Volume 27 |
| Charter Language: | Latin |
| Charter Origin: | Religious |
| Charter Type(s): | Inspeximus |
| Date: | 1191 - 1198 |
| Date type: | Assigned |
| Resource Link(s): |
|
Charter:
Gaufridus Dei gratia Eboracen[sis] archiepiscopus et Anglie primas universis sancte matris ecclesie filiis ad quos presens scriptum pervenerit salutem in Domino Adeo temporibus nostris ardor ambitionis invaluit ut legitime donationes vix possint firmitatem obtinere nisi scriptis autenticis fuerint communite Inde est quod per presentem paginam ad universitatis vestre notitiam pervenire volumus nos inspexisse cartam karissimi fratris nostri I[ohannis] comitis Moret ex qua nobis innotuit ipsum pro salute anime sue et bone memorie patris nostri H[enrici] regis et fratris nostri regis H[enrici] iunioris et antecessorum suorum concessisse dedisse et confirmasse Deo et beate Marie et venerabili patri nostro Waltero Roth archiepiscopo et successoribus suis et ecclesie Roth capellaniam de Blia cum omnibus pertinentiis suis libere quiete pacifice et integre perpetuo possidendam salvo in omnibus iure episcopali Cartam etiam karissimi domini et fratris nostri Ric[ardi] illustris Anglorum regis inspeximus ex qua cognovimus quod ipse dictam donationem ratam habuit atque autentico suo communivit Quoniam autem nos volumus predictam donationem contra detestandam calumpniantium temeritatem pleniorem optinere firmitatem ipsam ratam habemus et presenti scripto et sigilli nostri appositione confirmamus Testibus Steph[an]o Baiocen[si] decano magistro Greg[orio] Exon[iensi] canonico magistro Honorio magistro Henr[ico] de Wigorn[ia] magistro Rad[ulpho] de Hamton magistro Ric[ardo] Normanno Nigello de Riponte Rogero de Barnevill Willelmo de Bruier Gisleb[erto] filio Reifrid