Charter Document - 03290227

Omnibus sancte matris ecclesie filiis presens scriptum inspecturis Eustachius divina permissione Lond ecclesie minister humilis salutem eternam in domino Cum mota est controversia inter priorem et canonicos sancti Bartholomei Lond ex una parte et magistrum et fratres hospitalis sancti Bartholomei ex altera coram venerabili fratre Benedicto Roffens episcopo et coniudicibus suis a summo pontifice delegatis super magistro eisdem fratribus preficiendo super fratribus recipiendis et aliis articulis quam plurimis tandem post multas altercationes utraque pars spontanea voluntate super omnibus articulis et questionibus motis et non motis tempore confectionis istius scripture mutuo ad invicem competentibus se nostre subiecit remota appellatione ordinationi Nos igitur habito virorum discretorum et iuris peritorum consilio utriusque partis utilitati paci providere cupientes et tranquillitati ita duximus ordinandum videlicet quod cum creandus fuerit magister in hospitali sancti Bartholomei fratres eiusdem hospitalis ad priorem sancti Bartholomei accedant et petita ab ipso eligendi licentia personam sibi in magistrum eligant ydoneam sacerdotem videlicet vel talem qui ad ordinem sacerdotii in brevi possit promoveri Quo electo dicto presentetur priori et si ydoneus fuerit ab priore domino Lond episcopo presentabitur qui post electionis sue confirmationem in capitulo dictorum prioris et canonicorum iurabit priori obedientiam et tam priori quam conventui fidelitatem Et ne idem magister a prefato priore vel conventu super inobedientia posset redargui si pro sua voluntate que sibi placeret in virtute obedientie valeret iniungere sciendum quod dictus magister non tenebitur ad obedientiam memorato priori exhibendam nisi in articulis tantum in hac ordinatione nostra subsequenter contentis Cum autem aliquis in fratrem fuerit recipiendus a priore petatur licentia et si ignotus fuerit priori recipiendus et magister et fratres hospitalis sancti Bartholomei in obedientia et fidelitate qua ei tenentur asserant quod credant eum esse idoneum et domui sue necessarium prior omni cessante cavillatione prebebit assensum Si vero notus et ydoneus similiter Si notus non tamen secundum opinionem prioris ydoneus magistro et fratribus credentibus et asserentibus ipsum idoneum hoc per episcopum vel eius officialem vel si absentes fuerint et negotium instantiam desideret per capitulum sancti Pauli discutiatur et si ydoneus inveniatur admittatur non obstante prioris reclamatione Et cum admissus fuerit accedat prior vel mittat ad capitulum fratrum hospitalis et habitum tradat admisso Quo facto iurabit admissus ibidem presente priore et magistro hospitalis dictis priori et conventui fidelitatem et magistro loci obedientiam Si vero aliquis egrotans fraternitatem dictorum fratrum hospitalis desideret hoc priori insinuetur ut ipse incontinenti ad egrotum accedat vel mittat et habitum ei si voluerit tradat alioquin ne mora dicto hospitali sit periculosa liceat loci magistro eidem auctoritate sua habitum tradere Similiter si extra civitatem egrotans habitum dictorum fratrum desideret Qui si convaluerit infra octo dies post convalescentiam in fratrum capitulo sicut predictum est sacramentum fidelitatis faciet dictis priori et conventui et magistro loci obedientiam Eadem forma observetur de sororibus recipiendis Cum vero fratres hospitalis exierint ad predicandum vel ad elemosinas colligendas iurabunt quod nichil in tota vita sua petent nisi nomine expresso hospitalis sancti Bartholomei nec recipient aliquid quod ad canonicos sancti Bartholomei pertineat Quod si fecerint cum redierint eisdem canonicis sine diminutione restituent Idem vero canonici cum exierint in virtute obedientie priori suo promittunt videlicet quod nichil petent nisi expresso nomine canonicorum sancti Bartholomei Et si aliquid receperint nomine hospitalis vel quod ad hospitale pertineat fratribus hospitalis bona fide et integre restituent Et si conversus fuerit illud idem iurabit nec aliquis etiam laicus ad elemosinas colligendas ab alterutra domo mittatur nisi prius prefato prestito iuramento Magister vero hospitalis fratrum et sororum excessus per se si possit corrigat Quod si non possit ad instantiam magistri hospitalis prior sancti Bartholomei ad fratrum capitulum accedat ut corrigenda de ipsius consilio et magistri corrigantur Quod si negligentes fuerint vel per ipsos corrigi nequiverint per episcopum vel eius officialem correctio adhibeatur Magister vero hospitalis nulli in perpetuum victum perpetuum irrequisito prioris assensu dare poterit nec alienationes reddituum vel possessionum in perpetuum facere nisi ob necessitatem vel domus hospitalis utilitatem et secundum quod iustum fuerit Sigillum hospitalis sub tribus clavibus custodiatur quarum unam habebit magister hospitalis et duas alias duo de fratribus eiusdem hospitalis per magistrum et fratres hospitalis de consilio dicti prioris ad hoc electi Quos idem prior refutare vel mutare non poterit dum modo magister et fratres hospitalis ipsos credant ydoneos Magister et fratres omnes qui sani fuerint et presentes in civitate exceptis pauperum obsequio deputatis die Pasche floridi et die ascensionis domini nisi rationabili causa fuerint prepediti ad processionem sancti Bartholomei venient et eam sequentur Die siquidem sancti Bartholomei duo de fratribus sepe dicti hospitalis duos cereos de suo quatuor librarum nomine magistri et fratrum suorum ad processionem deferent et expleta processione illos ad maius altare sancti Bartholomei offerent Quo facto absque calumpnia cum voluerint ad domum suam revertentur Altare sive ymago sancti Bartholomei in prefato hospitali in dictorum canonicorum preiudicium non erigatur in perpetuum Nec campanas plures quam modo videlicet duas nec maiores nec campanile solemnius dicti fratres habeant Illud tamen perficiatur in vigilia pasche non pulsabunt priusquam pulsetur apud sanctum Bartholomeum Cimiterium vero quod fratres ex indulgentia domini pape sibi concessum petebant benedici non habebunt nec aliud petent decetero quam cimiterium apud dictos canonicos sepulture pauperum deputatum Si quis tamen de civitate Lond vel aliunde sepulturam pauperum hospitalis elegerit corpore ipsius ad idem hospitale delato et missa pro ipsius et pro fidelium animabus celebrata in dicto cimiterio sepulture pauperum deputato ac si inter pauperes in eodem hospitali decessisset tumulabitur Beneficium vero quod fratres hospitalis a memoratis hactenus perceperunt canonicis scilicet totam panis sui decimationem canonicorum et fratrum panis potus piscis et carnium reliquias cum canonicorum anniversaria maiori hilaritate et uberius si fieri potest quam hactenus consueverunt percipient si huiusmodi anniversaria alicui vel alicubi dentur et dictorum canonicorum ad ipsorum collationes suppetant facultates Hanc autem ordinationem nostram et amicabilem compositionem utraque partium firmiter et bona fide iuramento interposito se observaturam promisit renuncians appellationi supplicationi et in integrum restitutioni item omnibus questionibus tempore istius compositionis mutuo adinvicem competentibus sive mote fuerint sive non et omnibus instrumentis impetratis et impetrandis ita quod si qua fuerint instrumenta alterutrius partis hanc compositionem tantum modo contingentia pro cancellatis habebuntur Si vero aliquam fuerint que non solum hanc compositionem contingant set et alios contineant articulos quantum ad hanc compositionem pro cancellatis habebuntur et quantum ad alia suam optineant firmitatem Si vero super premissis prior et conventus ex una parte vel magister et fratres ex altera difficiles se reddiderint vel super eisdem inter ipsos questionem oriri contingat ad episcopum vel eius officialem vel eis absentibus ad capitulum sancti Pauli querimonia deferatur et ibidem omni appellatione et cavillatione remotis terminetur Ut autem hec nostra ordinatio rata et inconcussa futuris permaneat temporibus presenti scripto in modum cyrographi tripartite confecto sigillum nostrum et capituli nostri una cum sigillis partium duximus apponendum Cuius una pars penes dictum priorem et canonicos sancti Bartholomei altera penes magistrum et fratres memorati hospitalis et tertia in thesauro sancti Pauli remanebit Et ne aliquid de contentis capitulis per oblivionem negligatur prior cum aliquot de canonicis suis singulis annis in crastino cinerum ad capitulum fratrum dicti hospitalis et ibi congregatis fratribus in communi audientia cyrographum suum legi faciat feria vero sexta sequenti magistri hospitalis cum aliquod de fratribus suis hora capituli ad capitulum sancti Bartholomei accedat et ibi cyrographum suum similiter legi faciat Actum Lond apud sanctum Paulum Kalendis Iulii pontificatus nostri anno tercio Salvis in omnibus iure et dignitate Lond ecclesie