Charter Document - 03290224

Omnibus Cristi fidelibus ad quos presens scriptum pervenerit Eustachius divina miseratione Lundon ecclesie minister humilis salutem eternam in domino Noverit universitas vestra quod cum inter nos et capitulum nostrum ex una parte et Benedictum abbatem et conventum de Coggeshale ex altera super ecclesia de Sunnedon controversia mota fuisset tandem post multas altercationes unanimi assensu et spontanea voluntate provisioni domini Iohannis Elyensis episcopi super eadem ecclesia nos subiecimus et ordinationi firmiter et bona fide promittentes nos omni cessante cavillatione et appellatione observaturos quod idem super hoc ordinaret episcopus Qui facta a predictis abbate et monachis de Coggeshale totius iuris quod in dicta sibi vendicabant ecclesia in manus nostras resignatione habito virorum prudentum et iurisperitorum consilio ita duxit ordinandum videlicet quod idem monachi in pauperum et hospitum sustentationem iure perpetuo possidebunt omnes decimas garbarum totius parrochie memorate ecclesie cum tota terra ad eandem ecclesiam pertinente exceptis manso capitali et decem et novem acris in Norfeld eidem manso propinquioribus et una acra in campo qui vocatur Westfeld ex parte orientali usque ad pratum et toto prato citra cursum aque ex parte boreali et exceptis tenementis que de eadem tenent ecclesia Walterus de Rusteford Iohannes Gallicus Willelmus de Fonte Willelmus Boie Iohannes del Brok Edit vidua et eorum servitiis Que omnia cum omnibus aliis decimis obventionibus et aliis omnibus ad dictam ecclesiam pertinentibus vicarius qui pro tempore in eadem ministrabit ecclesia nomine vicarie percipiet et omnia onera debita et consueta sustinebit Cuius vicarie ordinatio et collatio ad nos et ad successores nostros spectabit in perpetuum Si vero contigerit mesuagium aliquod vel terram eiusdem parrochie in dominium dictorum monachorum converti ex cuius conversione dicta deterioretur vicaria idem monachi vicario qui pro tempore fuerit arbitrio bonorum virorum tenebuntur adinteresse Monachis siquidem de Rumelliaco pensionem debitam et antiquam plene persolvent Ratione vero predicte portionis sepedictos monachos contingentis celebrationi synodorum vel capitulorum nisi ratione delicti in Lundon diocesi perpetrati non tenebuntur interesse Et ut predicta ordinatio perpetuam optineat firmitatem nos eandem auctoritate pontificali consensu capituli nostri interveniente confirmantes presenti scripto in modum cyrographi confecto sigillum nostrum et capituli nostri una cum sigillis prefati Elyensis episcopi et dictorum abbatis et monachorum duximus apponendum Hiis testibus domino Philippo de Falkob[er]g magistris G de Luci W de Argentem R de Raden et aliis Actum apud Reines vi Idus Ianuarii pontificatus nostri anno secundo