Charter Document - 03290177

Omnibus Cristi fidelibus ad quos presens scriptum pervenerit Willelmus dei gratia London ecclesie minister humilis salutem in domino Hiis qui mundo cum suis pompis despecto soli deo militant et felici comercio pro caducis permansura commutare student ut habeant quo sustententur et liberius contemplacioni vacare valeant pium et honestum est ecclesie prelatos deum timentes providere et collatas talium sustentationi possessiones ut eas quiete possideant scriptis autenticis et instrumentis eis confirmare pariter et comunire Eapropter universitati vestre notum esse volumus nos divine pietatis intuitu habito respectu ad religionis fervorem et piam devotionem dilectorum in Cristo filiorum nostrorum abbatis et monachorum de Waleden attendentes etiam ecclesiam beati Iacobi in qua deo iugiter famulantur ita fundatam ut possessionibus laicis minus habundans solummodo beneficiis ecclesiasticis sustententur fructus omnes ecclesiarum subscriptarum videlicet de Waledena de Chishella de Haidena de Waltham de Estra de Enefelda de Edelmeton de Mimmes de Norhal de Torleia de Gedeleston de Hadleia et de Elsenham sicut carte fundatorum suorum eisdem testantur et ex autenticis pie memorie G et R predecessorum nostrorum cognovimus in usus suos proprios imperpetuum convertendas concessisse et episcopali qua domino dante fungimur autoritate confirmasse Ita sane quod vicarie perpetue pro facultatibus ecclesiarum competentes quibus sustententur hii qui per presentationem predictorum monachorum in eisdem ecclesiis sint ministraturi de assensu nostro vel successorum nostrorum ordinentur Et ut hec nostra concessio et confirmatio perpetue firmitatis robur optineat nos eam carte presentis annotatione pariterque sigilli nostri testimonio corroboravimus Hiis testibus R decano London Willelmo archidiacono London R archidiacono Colecestr P thesaurario Lond magistro Philippo de Hadham magistro W de Purl magistro I de Storteford Martino Stephano Rogero clericis et multis aliis