Charter Document - 03290161
| Charter Number: | 03290161 |
|---|---|
| Cartulary Title: | London 1189-1228 Volume 26 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1208 - 1209 |
| Date type: | Assigned |
| Resource Link(s): |
|
Charter:
W dei gratia London episcopus omnibus sancte matris ecclesie filiis per episcopatum London constitutis salutem in auctore salutis eternam Cum nuper apostolica iussione per totam Angliam fuisset generalis interdicti sententia promulgata adeo quidem ut nusquam liceret defunctorum corpora sicut moris erat Cristiane tradere sepulture viri nobiles et karissimi in Cristo filii H maior et cives London a dilectis filiis priore et canonicis sancti Bartholom nec[non] a procuratore ac fratribus hospitalis eorumdem postulaverunt ut eis aream quandam hospitali sancti Barthi ex orientali parte adiacentem ad publicam mortuorum suorum sepulturam indulgerent Quorum piam petitionem attendentes memorati tam canonici quam fratres simulque urgentem totius urbis necessitatem considerantes postulatibus eorumdem consensum adhibuere felicem et benignum Verum ne sub pretextu pietatis istius oriri possit impietatis occasio sano quidem et salubri consilio provisum est in communi ut area memorata mortuis deferendis secundum que cives disposuerunt deputanda circumquaque claudatur aperto aditu ad usum sepulture civibus reservando Cautum est etiam diligenter ut nulli liceat corpora defunctorum quos in hospitali predicto mori contigerit in eadem area sepelire Omnes enim eiusdem hospitalis tam fratres quam pauperes aliunde venientes durante interdicto sicut et ante fieri consuevit secundum arbitrarium canonicorum in loco competenti ab eis canonicis providendo sepelientur Sane quam cito gratia divina largiente sacrosanctam ecclesiam pristina tranquillitate ac libera sacramentorum suorum observantia gaudere contigerit locus sepedictus ad ius et possessionem fratrum hospitalis libere revertetur Dum tamen nulli omnino hominum liceat ulterius in eadem area defunctum aliquem sepelire Hec autem que scripta sunt ut futuris temporibus inter memoratos canonicos et fratres hospitalis pax inconcussa servetur sigilli nostri testimonio curavimus communire Hiis testibus A decano ecclesie sancti Pauli London R archidiacono Colecestere R archidiacono Excessie I cancellario B precentore R de Camera I de sancto Laurentio H maiore London Constantio filio Anulfi Arnaldo fratre suo Alano filio Petri Willelmo filio Reigner Thoma de Haverulle T filio Nigelli Michaele de Valentin et aliis