Charter Document - 03290151
| Charter Number: | 03290151 |
|---|---|
| Cartulary Title: | London 1189-1228 Volume 26 |
| Charter Language: | Latin |
| Charter Origin: | Religious |
| Charter Type(s): | Notification |
| Date: | 1206 |
| Date type: | Assigned |
| Resource Link(s): |
|
Charter:
Universis Cristi fidelibus ad quos presentes littere pervenerint W dei gratia London episcopus salutem in domino Cum inter P priorem et conventum sancte Trinitatis London ex una parte et R de Toeni ex altera super decimis feni de Wildemershe et piscariarum eiusdem Rogeri de Laluie et obventionibus cuiusdem capelle infra parrochiam de Welcumestowe site diutius questio verteretur nos eidem liti finem imponere cupientes ipsam dilecto in Cristo filio A decano London commisimus terminandam Qui quidem partibus ad suam presentiam convocatis auditis hinc inde propositis post altercationes varias et dilationes multiplices tandem totam causam sententia diffinitiva conclusit iuris ordine per omnia custodito meritisque cause diligentius consideratis decimas feni de Wildemershe et piscariarum de Laluie ad prefatum Rogerum pertinentium obventiones quoque capelle de qua querebatur quotiens in ipsa capellanus prioris ministraverit provida deliberatione sepedictis priori et conventui nomine matricis ecclesie de Welcumestowe sententialiter adiudicavit Quam nimirum sententiam ratam habentes et firmam eam sicut iuste et canonice lata est episcopali auctoritate sub presentis scripti testimonio confirmamus ipsamque dilecto in Cristo filio R archidiacono Essex mandavimus executioni demandandam Valete