Charter Document - 03290119
| Charter Number: | 03290119 |
|---|---|
| Cartulary Title: | London 1189-1228 Volume 26 |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1201 |
| Date type: | Assigned |
| Resource Link(s): |
British Library - Cotton MS Cleopatra B I (f120v) |
Charter:
Reverentissimo domino et patri I dei gratia summo pontifici W divina permissione Lundoniens ecclesie minister salutem et tam devotum quam debitum in omnibus obedientie famulatum Quoniam ea que dominus pro dilatanda sui nominis gloria modernis temporibus manifestare dignatus est non sunt digna latere sub modio sed super candelabrum ponenda ut lucem ceteris ad augmentum fidei simul et salutis amministrent licet per se clara satis et gloriosa consistant oportunum tamen est ut a sacrosancta Romana ecclesia de qua cetera per orbem terrarum late diffuse fundamentum habent religionis et honestatis auctoritatem venerationis accipiant ut sic a cunctis devotius et licentius honorentur Sane quante fuerit vir sanctitatis et innocentie magister G de Sempingh primus ordinis illius institutor et rector quantumque tempore suo religionem ordinis quam instituit provexerit et ampliaverit ad notitiam sedis Romane iampridem pervenisse credendum est Verumptamen quanta miraculorum insignia sicut a cunctis penes nos publice predicatur per illius sancti viri merita post transitum ipsius frequenter ille qui in sanctis suis semper est mirabilis operatus sit nec sic evidenter nisi per magnorum et religiosorum virorum veridicum testimonium eidem constare posse dinoscitur Vestrum igitur erit pater reverende auditis et pro certo cognitis tot et tantorum virorum super hac re multiplicatis testimoniis providere quali et quanto sit honore dignus in terris qui ob suorum magnitudinem meritorum habundanter apud deum honorari creditur in celis