Charter Document - 03290059

Ricardus dei gratia Lundon episcopus omnibus sancte matris ecclesie filiis per episcopatum Lundon constitutis eternam in domino salutem Ea que pia devotione a Cristi fidelibus domibus religiosis iuste conferuntur dignum est episcopali auctoritate confirmari ne per succedentia tempora possint aliqua malignantium protervitate a sui status integritate ab eisdem divelli Ea propter universitati vestre notum fieri volumus nos petitione et presentatione Gaufridi de Bella Valle domini fundi de Magna Burgestede virum venerabilem Willelmum abbatem et conventum de Stratford in ecclesia iamdicte ville vacante personas instituisse et ipsos in corporalem possessionem eiusdem ecclesie perpetuo possidende sollempniter induxisse concedentes predictis abbati et conventui ut eandem ecclesiam habeant et teneant cum terris decimis pascuis et aliis possessionibus ad eam pertinentibus et ut fructus omnes qui ad prefatam spectant ecclesiam pro uberiori domus eiusdem sustentatione que passim omnibus patet in proprios usus convertant Ita tamen quod ipsi monachi vicarium idoneum eligant et episcopo Lundon quicumque pro tempore fuerit representent Percipiet autem iam dictus vicarius singulis annis quam diu bene ministraverit omnes obventiones altaris et decem solidos de uno marisco et quadraginta denarios de camera ipsorum monachorum Et ipse sustinebit omnia onera episcopalia consueta et usitata auxilium vero episcopi et ecclesie dedicatio et ipsius reparatio et in ornamentis competens provisio ad ipsum collegium spectabit Ne igitur que predicta sunt possint diuturnitate temporis in irritum devocari pagine presentis inscriptione pariterque sigilli nostri testimonio ea communire curavimus Hiis testibus Petro archidiacono Lund magistro Alardo Willelmo de Ely Ricardo de Windlesor canonicis Rogero Alano Berengario Ricardo capellanis magistro Alexandro Radulfo de sancto Paulo Iohanne de Waltha Willelmo de Hedfeld Radulfo de Lewes Hugone de Neuton clericis Iocelino capellano et aliis