Charter Document - 03290051
| Charter Number: | 03290051 |
|---|---|
| Cartulary Title: | London 1189-1228 Volume 26 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1196 - 1198 |
| Date type: | Assigned |
| Resource Link(s): |
|
Charter:
Omnibus Cristi fidelibus Ricardus dei gratia London ecclesie minister salutem in domino Hiis qui mundo cum suis pompis despecto soli deo militant et felici commercio pro caducis permansura commutare student ut habeant quo sustententur et liberius contemplationi vacare valeant pium et honestum est ecclesie prelatos deum timentes providere et collatas talium sustentationi possessiones ut eas quiete possideant scriptis autenticis et instrumentis eis confirmare pariter et communire Eapropter universitati vestre notum esse volumus nos divine pietatis intuitu habito respectu ad religionis fervorem et piam devotionem dilectorum in Cristo filiorum nostrorum abbatis et monachorum de Waleden attendentes etiam ecclesiam beati Iacobi in qua deo iugiter famulantur ita fundatam ut possessionibus laicis minus habundans solummodo beneficiis ecclesiasticis sustententur fructus omnes ecclesiarum quas de donatione Gaufridi de Mandevilla et Willelmi de Mandevilla comitum necnon et aliorum donatorum sicut carte eorum testantur in nostra diocesi habent et quas per predecessoris nostri Gilberti Foliot concessionem adepti sunt in usus proprios imperpetuum convertendos concessisse et episcopali qua domino dante fungimur autoritate confirmasse Ita sane quod vicarii pro facultatibus ecclesiarum competentes quibus sustententur hii qui per presentationem predictorum monachorum in eisdem ecclesiis sint ministraturi de assensu nostro vel successorum nostrorum ordinentur Et ut hec nostra concessio et confirmatio perpetue firmitatis robur obtineat nos eam carte presentis annotatione pariterque sigilli nostri testimonio roboravimus Hiis testibus Radulfo abbate sancte Osith Alardo archidiacono Lond Willelmo de Ely domini regis thesaurario magistro Rogero magistro Benedicto Alano capellano Iohanne de Garland canonicis sancti Pauli Ricardo capellano Willelmo de Wald magistro Gaufrido de Garland Iohanne de Oxonia Iohanne de Waltha Willelmo de Hedfeld Radulfo de Grava clericis magistro Roberto de Meldis Willelmo de Castell et aliis multis